अमेरिकामा केही दिनदेखि घट्दै गएको कोरोना संक्रमणको दर फेरि बढ्न थालेको छ ।
कैयौं राज्यहरुमा फेरि भाइरसको संक्रमण बढेको अमेरिकी अधिकारीहरुले जनाएका छन् ।
अमेरिकाभर शनिबार एकैदिन संक्रमणको ४० हजार नयाँ केस रेकर्ड भएको छ । संक्रमितहरुको संख्या ह्वात्तै बढेपछि ह्वाइट हाउसको टास्क फोर्सले मौजुदा अवस्थाको बारेमा जानकारी दिन पत्रकार सम्मेलन नै गर्नुपरेको छ ।
यस अघि अप्रिल २४ मा एकै दिन ३६ हजार ४०० नयाँ केस देखिएको थियो ।
संक्रमणको मामिलामा देखिएको यो ताजा तथ्यांकले अमेरिकाका सबै ५० राज्यमा लकडाउन खोल्नुलाई जिम्मेवार मानिएको छ ।
अर्थतन्त्रलाई चलायमान बनाउन लकडाउन हटाएपछि अमेरिकामा कोरोना संक्रमितको संख्या ह्वात्तै बढेको हो । लकडाउनका कारण अमेकिरामा अहिलेसम्म पचासौं लाख मानिसको रोजगारी गुमिसकेको छ ।
नियमित काम पुनः सुरु भएसँगै मानिसहरुले रोजगारी पाउन थालेका थिए । तर कोरोनाको संक्रमणको दोस्रो लहर आउन थालेपछि लकडाउनबारे गरिएको पूर्व विश्लेषणमाथि प्रश्न उठेको छ ।
अमेरिकामा हालसम्म कोरोना संक्रमणका कारण १ लाख २८ हजार बढीको ज्यान गैसकेको छ ।
२५ लाख ९६ हजार बढी संक्रमित भएका छन् भने त्यसमध्ये १० लाख ८१ हजार बढी निको भएर घर फर्किएका छन् । अझै पनि १३ लाख ८७ हजार जति कोरोनाका बिरामी रहेका छन् ।
प्रतिक्रिया