काठमाडौं । अख्तियार दुरुपयोग अनुसन्धान आयोगले २ लाख ४१ हजार १६ रुपैयाँ घुससहित ४ जनालाई पक्राउ गरेको छ ।
दैलेख जिल्लाको भगवतीमाई गाउँपालिका वडा नं ३ सानटडा खोला तटवन्धन निर्माण कार्य सम्पन्न भए पछि भुक्तानीका क्रममा घुस मागेको अभियोगमा अख्तियारले ती चार जनालाई पक्राउ गरेको हो ।
पक्राउ पर्नेमा खानेपानी, सिंचाई तथा उर्जा विकास कार्यालय दैलेखका निमित्त कार्यालय प्रमुख (इन्जिनियर) टोपेन्द्र सुन्दर मल्ल, सव–इन्जिनियर विरेन्द्र चन्द, रन्जित श्रेष्ठ र सुरपभाइजर लक्ष्मी पाण्डे रहेका छन् ।
भुक्तानीमा सहजीकरण गरिदिने मल्ल र चन्दले सेवाग्राहीसँग घुस मागेको उजुरी सुर्खेतस्थित अख्तियार कार्यालयमा परेको थियो ।
उजुरीका आधारमा खटिएको अख्तियारको टोलीले मल्ललाई कार्यालय परिसरबाट र चन्दलाई फिल्डबाटै नियन्त्रणमा लिएको थियो । उनीहरुको खानतलासी गर्दा मल्लको आवासबाट दुई लाख ४१ हजार सोह्र रुपैयाँ बरामद भएको अख्तियार प्रवक्ता प्रदीप कुमार कोइरालाले जानकारी दिए ।
घुस माग्ने कार्यमा संलग्नता देखिएपछि श्रेष्ठ र पाण्डे समेतलाई नियन्त्रणमा लिइएको अख्तियारले जनाएको छ ।
प्रतिक्रिया