अछामका एक पुरुषको कोरोना संक्रमणबाट मृत्यु, मृतकको संख्या ३० पुग्यो

काठमाडौं । कोरोना भाइरसको संक्रमणबाट नेपालमा अर्का एक व्यक्तिको मृत्यु भएको छ ।

स्वास्थ्य तथा जनसंख्या मन्त्रालयका अनुसार अछामको रामरोशनका ४५ वर्षीय पुरुषको असार १४ गते कोरोनाबाट मृत्यु भएको हो ।

असार १३ गते स्वाश्वप्रश्वासमा समस्या भै बयलपाटास्थित अस्पतालमा उपचारका लागि पुगेका ती पुरुषको १४ गते मृत्यु भएको मन्त्रालयका प्रवक्ता प्रा.डा. जागेश्वर गौतमले बताए । उनी मधुमेहका रोगी थिए ।

मृत्युपश्चात उनको स्वाब संकलन गरी १५ गते पीसीआर परीक्षण गरिएको थियो । १६ गते उनको रिपोर्ट पोजेटिभ आएको प्रवक्ता गौतमले जानकारी दिए ।

उनीसँगै रहेका अन्य दुई जना कुरुवाको भने पीसीआर परीक्षण नतिजा नेगेटिभ आएको छ ।

यससँगै हालसम्म नेपालमा कोरोना भाइरसको संक्रमणबाट मृत्यु हुनेको संख्या ३० पुगेको छ ।