काठमाडौं । गत मंगलबारदेखि नाटकीय रुपमा तिब्र अन्तसंघर्ष बढेको सत्तारुढ नेपाल कम्युनिष्ट पार्टी नेकपाभित्र थप तरङ्ग उत्पन्न भएको छ ।
सरकारले संसद अधिवेशन अन्त्य गर्ने निर्णय गरेपछि प्रधानमन्त्री निवास बालुवाटारमा जारी स्थायी कमिटी बैठक स्थगित भएको छ ।
बिहीबार मध्यान्न बालुवाटारमा बसेको मन्त्रिपरिषद् बैठकले संसद अधिवेशन अन्त्य गर्ने निर्णय गर्दै राष्ट्रपतिलाई सिफारिस गरेको थियो । राष्ट्रपतिले बिहीबारै साँझ ५ बजेदेखि अधिवेशन अन्त्य गरिसकेकी छिन् ।
मन्त्रिपरिषद् बैठक लगत्तै सुरु भएको स्थायी कमिटी बैठकमा प्रधानमन्त्री एवं पार्टी अध्यक्ष केपी शर्मा ओली अनुपस्थित भएका थिए । बैठक सुरु भएको केही समयसम्म ओली अनुपस्थित भएपछि अर्का अध्यक्ष प्रचण्डले बैठक केही बेरका लागि स्थगित गरेका थिए ।
अब बैठक द्ई अध्यक्षबीच छलफल भएपछि मात्र बस्नेछ ।
आफुलाई पार्टी अध्यक्ष र प्रधानमन्त्रीबाट हटाउने प्रचण्ड–नेपाल गुटको निर्णयपछि मर्माहत भएका ओलीले संसदको अधिवेशन अन्त्य गरिदिएर फायर खोलेपछि स्थायी कमिटी बैठक समेत प्रभावित बन्न पुगेको हो ।
आफुलाई कमजोर हुनेगरी गरिने निर्णयहरुलाई कमजोर बनाउन ओलीले अधिवेशन अन्त्य गरेर राजनीतिक दल विभाजनसम्बन्धी अध्यादेश ल्याउने तयारी गरेको बुझिएको छ ।
नेकपा स्थायी कमिटी बैठकले बुहमतले निर्णय गरेर पार्टी अध्यक्षबाट हट्न दबाब दिए पनि ओलीले त्यसलाई अस्वीकार गर्नेगरी नयाँ रणनीति बनाउन समय प्राप्त गरेका छन् ।
कसैगरी केन्द्रीय कमिटी बैठकले समेत ओलीले निर्णय गरेमा पनि संवैधानिक प्रावधान अनुसार ओलीलाई संसदीय दलबाट हटाउन सहज अवस्था छैन । यदि संसदीय दलमा पुनः निर्वाचन गर्ने अवस्था आयो भने ओलीले ल्याउन लागेको भनिएको संभावित दल विभाजनसम्बन्धी अध्यादेशले नेकपा नै फुटाइदिने अवस्था सिर्जना भएको छ ।
प्रतिक्रिया