काठमाडौं । कोरोना भाइरसको संक्रमणकाका कारण काठमाडौंका एक जना वृद्धको मृत्यु भएको छ ।
नयाँ वानेश्वर निवासी ८५ वर्षी वृद्धको असार १७ गते राति ११ बजे एक निजी अस्पतालको आईसीयूमा मृत्यु भएको स्वास्थ्य तथा जनसंख्या मन्त्रालयका प्रवक्ता प्रा.डा. जागेश्वर गौतमले जानकारी दिए ।
उच्च रक्तचाप र पार्किन्सन रोगका बिरामी उनी छाती दुख्ने र पिसाबमा समस्या भएपछि अस्पताल भर्ना भएका थिए ।
यससँगै कोरोना संक्रमणबाट मृत्यु हुनेको संख्या नेपालमा ३२ पुगेको छ ।
नेपालमा कोरोना भाइरसको संक्रमण पनि बढ्दो क्रममा रहेको छ । पछिल्लो २४ घण्टामा कोरोना भाइरसका ७४० जना नयाँ संक्रमित थपिएका छन् ।
स्वास्थ्य तथा जनसंख्या मन्त्रालयले हरेक दिन आयोजना गर्ने नियमित प्रेस ब्रिफिङमा दिइएको जानकारी अनुसार ४ हजार ४ सय ८४ जनाको नमूना परीक्षण गरिएकोमा ७४० जनाको रिपोर्ट पोजेटिभ आएको हो ।
शुक्रबार थपिएका ७४० सहित नेपालमा संक्रमितको संख्या १५ हजार २ सय ५९ पुगेको छ।
पछिल्लो २४ घण्टामा थप ८२३ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या ६१४३ पुगेको छ।
यसैबीच, सरकारले कोरोना भाइरस परीक्षणको दायरा बढाएको छ । अब क्याक्सर र डाइबिटिजका विरामी, इमर्जेन्सी र आईसीयूमा भर्ना भएका बिरामी र पकेट एरियामा बस्नेहरुको परीक्षण गरिने मन्त्रालयका प्रवक्ता डा। जागेश्वर गौतमले जानकारी दिए । यसैगरी स्वास्थ्यकर्मीहरुको पनि परीक्षण गरिने भएको छ ।
प्रतिक्रिया