काठमाडौं । सत्तारुढ नेपाल कम्युनिष्ट पार्टी नेकपाको स्थायी कमिटी बैठक आज पनि स्थगित भएको छ । पार्टीभित्र तिब्र अन्तसंघर्ष भएपछि पटकपटक स्थगित हुँदै आएको बैठक आज बिहान ११ बस्ने तय गरिएको थियो ।
पार्टी र राज्यसत्ताको नेतृत्वका विषयमा शिर्ष नेताहरुबीच अन्तर्संघर्ष चर्किएपछि नेकपा संकटमा पर्दै आएको छ । गत असार १० गतेदेखि सुरु भएको स्थायी कमिटी बैठकमा असार १६ गतेपछि पार्टीभित्रको अन्तर्संघर्षले प्रभावित हुँदै आएको छ ।
असार १६ गतेदेखि प्रधानमन्त्री एवं पार्टी अध्यक्ष केपी शर्मा ओलीलाई दुवै पदबाट राजीनामा दिन अध्यक्ष पुष्पकमल दाहाल प्रचण्ड एवं माधव नेपाल समुहबाट निरन्तर दबाब दिन थालिएपछि पार्टी फुटको अवस्थासम्म पुगेको छ । विवादकै कारण असार १९ गते, २२ गतेको बैठक पनि स्थगित हुँदै आएको थियो ।
बैठक २६ गते बिहान ११ बजेसम्म स्थगितको सूचना आएको स्थायी कमिटी सदस्य देवेन्द्र पौडेलले खबरकुरालाई बताए । नेता पौडेलले पार्टीमा शिर्ष नेतृत्व मिल्नुको विकल्प नभएको बताउँदै सहमति खोज्नैका लागि बैठक स्थगित गरिएको जानकारी दिए ।
विवाद समाधान गर्न भन्दै अध्यक्षद्वय ओली र प्रचण्डबीच यसबीचमा पटकपटक छलफल हुँदै आएको छ । तर, अहिलेसम्म पनि दुई नेताबीच कुनै सहमति हुन सकेको छैन । मंगलबार पनि दुई अध्ययक्षबीच झण्डै तीन घण्टा छलफल भएको थियो ।
प्रतिक्रिया