इटहरी । बिहीबार राति सुनसरीको देवानगञ्जमा प्रहरी र आपराधिक समूहबीच गोली हानाहान भएको छ ।
सुनसरी प्रहरीले नियमित रुपमा सञ्चालन गर्दै आएको सर्च अप्रेसन अन्तर्गत गस्तीमा रहेको प्रहरी टोली र आपराधिक समूहबीच गोली हानाहान भएको प्रहरीले जनाएको छ ।
जिल्ला प्रहरी कार्यालय सुनसरीका अनुसार, राति १० बजे देवानगञ्ज–३ मा ४–५ जनाको संख्यामा रहेका युवालाई सर्च गर्दा दुबै पक्षबीच गोली हानाहान भएको थियो ।
सो क्रममा हतियार खोसाखोस गर्ने क्रममा एक थान पेस्तोल, केही राउण्ड गोली र २ थान म्यागेजिन समेत बरामद भएको छ ।
सुनसरी प्रहरी प्रमुख एसपी कमल थापाले घटनाको पुष्टि गर्दै दुईजना पक्राउ परेको समेत जानकारी दिए । दुबैतर्फको फाइरिङ हुँदा करिब १०–१२ राउण्ड गोली चलेको प्रहरीको भनाइ छ ।
दोहोरो फाइरिङ हुँदा दुई जनालाई गोली लागेको छ । गोली लाग्नेमा पिन्टु र राजेश भन्ने ब्यक्ति छन् । उनीहरु दुबैलाई खुट्टामा गोली लागेको छ । उनीहरु घाइते भएका कारण प्रहरीले आफ्नो नियन्त्रणमा लिन सकेको हो । बाँकी अन्य भने दशगजा क्षेत्र हुँदै फरार भएको एसपी थापाले बताए ।
‘उनीहरु भारतीय मूलका जस्ता ब्यक्तिहरु थिए । फरारको पनि खोजी कार्य भैरहेको छ’ एसपी थापाले भने, ‘उनीहरुलाई पनि गोली लागेको हुनसक्छ । स्थानीय अस्पतालहरुमा हामीले निगरानी बढाएका छौ ।’
प्रतिक्रिया