काठमाडौं । बैंकबाट कर्जा लिएका ऋणीहरुको भाका २ वर्ष सम्म थप्न सकिने निर्णय गर्दै आगामी आर्थिक वर्ष २०७७/७८ का लागि ल्याउन लागिएको मौद्रिक नीति नेपाल राष्ट्र बैंकले तयार गरेको छ ।
बैंकका ऋणीहरुको ब्याजदर, भाका थप, पुनरकर्जा जस्ताहरु सहुलियतकारुपमा दिन सकिने गरि तयार भएको राष्ट्रबैंकको मौद्रिक नीति बैंकको सञ्चालक समिति (बोर्डं) बाट पारित भएको छ ।
आगामी आर्थिक वर्षको मौद्रिक नीतिबाट ऋणीहरुलाई ऋण तिर्नका लागि समयावधि २ वर्षसम्म थपिने भएको छ । ऋणीको प्रकृति अनुसार ३ महिनादेखि २ वर्षसम्म ऋण तिर्ने समयावधि थप गर्ने गरी मौद्रिक नीति तर्जुमा भएको राष्ट्र बैंकका बोर्ड श्रोतले जानकारी दिएको छ ।
राष्ट्रबैंक श्रोतका अनुसार लकडाउनका कारण बढी प्रभावितले बढी सुविधा पाउनेछन् ।
मौद्रिक नीतिमा बैङ्कको ब्याजदरमा सहुलियतदेखि शेयर धितो कर्जा बढाउने तथा डिजिटल कारोबारलाई प्रोत्साहनसम्मको व्यवस्था गरिएको छ । यस्तै नीतिमा १ खर्ब बराबरको पुनर्कर्जा कोषलाई क्रमिक रुपमा बढाउने भनिएको छ ।
यसैगरी ब्याजलाई पुँजीकरण गर्न मिल्ने व्यवस्था पनि मौद्रिक नीतिले गरेको छ । यसैगरी सहुलियत कर्जा तथा पुनर्कर्जालाई गाउँ(गाउँसम्म पुर्याउने समेत नीतिमा उल्लेख गरिएको श्रोतले बताएको छ ।
मौद्रिक नीतिले पुनरकर्जा कोषलाई भने तत्कालै बढाउने विषयमा निर्णय लिएको छैन । हाल एक खर्बको रहनेभ निएको कोषलाई क्रमिक रुपले बढाउदै लगिने नीतिमा उल्लेख गरिएको छ ।
बोर्डबाट पारित भएसँगै मध्यान्ह ३ बजे नीति सार्वजनिक गर्ने राष्ट्र बैंकले जनाएको छ ।
प्रतिक्रिया