सुनसरी । माथिल्लो जलाधार क्षेत्रमा अविरल वर्षा कायम रहेसँगै सप्तकोशी नदीमा आएको बाढीले खतराको तह पार गरेको छ ।
मंगलबार बिहान गरिएको मापनअनुसार सप्तकोशीमा पानीको बहाव प्रतिसेकेन्ड ३ लाख ४२ हजार ९ सय ७० क्युसेक पुगेको छ । यो मापन यो वर्षकै उच्च भएको कोशी व्यारेज कन्ट्रोल शाखाले जनाएको छ ।
कन्ट्रोल शाखाका अनुसार कोशी ब्यारेजमा २ लाख क्युसेक प्रतिसेकेन्ड मापन हुँदा खतराको तह पार गर्छ । नदीको बहाव उच्च भएपछि ब्यारेजका ५६ मध्ये ४७ वटा ढोका खोलिएको छ ।
ब्यारेजमा रहेको दुबै तर्फको नहर पनि बन्द गरिएको छ । पानीको बहाव थेग्न नसकेर नहर भत्किन सक्ने भएकाले नहर बन्द गरिएको बताईएको छ ।
पानी पर्ने क्रम नरोकिएकाले पानीको बहाव अझै बढ्न क्रम जारी छ । जल तथा मौसम विज्ञान विभागको बाढी सूचना केन्द्रले सप्तकोशीमा बहाव बढ्दो क्रममा रहेको जनाएको छ ।
नदीको दुईतिर रहेका सुनसरी र सप्तरी जिल्ला प्रशासन कार्यालयले तटीय क्षेत्रमा बुधबार बिहानसम्म उच्च सतर्कताका साथ रहन वा सुरक्षित स्थानमा जान सर्व साधारणलाई सूचित गरेको छ । प्रहरीले नदी टटीय क्षेत्रका स्थानीयबासीलाई सतर्क रहन माईकिङ गरेर सुचित गरेको छ ।
प्रतिक्रिया