काठमाडौं । सरकार र नेपाल चिकित्सक संघबीच पाँचबुँदे सहमति भएपछि आजदेखि देशभरका अस्पतालमा नियमित रूपमा सबै स्वास्थ्य सेवा सञ्चालनमा आएका छन् ।
बुधबार साँझ स्वास्थ्य तथा जनसंख्या मन्त्रालयका प्रतिनिधि र नेपाल चिकित्सक संघबीच भएको वार्तामा पाँचबुँदे सहमति भएपछि संघले आन्दोलनका सम्पूर्ण कार्यक्रम फिर्ता लिएको हो ।
सहमतिसँगै आजदेखि देशभरका अस्पतालमा आकस्मिक सेवासहित सबै स्वास्थ्य सेवा नियमित रूपमा सञ्चालन हुन थालेका छन् ।
वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको आक्रमणको विरोधमा चिकित्सक संघ आन्दोलनमा उत्रिएको थियो ।
संघको आह्वानमा मंगलबार र बुधबार देशभरका अस्पतालमा आकस्मिक सेवाबाहेकका सबै स्वास्थ्य सेवा बन्द गरिएका थिए। सरकारसँग सहमति भएपछि आन्दोलन अन्त्य गर्दै अस्पतालका सबै सेवा पुनः नियमित रूपमा सञ्चालनमा आएका छन् ।
प्रतिक्रिया