वीरगन्ज । वीरगन्जको कोभिड अस्पतालमा उपचार गर्दागर्दै आइतबार बिहान मृत्यु भएका वृद्धको पीसीआर रिपोर्ट पोजेटिभ आएको छ ।
गण्डक कोभिड अस्पतालमा उपचाररत वीरगन्ज आदर्शनगरका ६५ वर्षीय वृद्धको आइतबार बिहान मृत्यु भएको थियो । उनको शनिबार साँझ आरडीटी परीक्षण गर्दा पोजेटिभ देखिएपछि गण्डक अस्पतालमा भेन्टिलेटरमा उपचार भैरहेको थियो ।
शनिवार साँझ वीरगंज हेल्थ केयर हस्पिटलमा आरडीटी परीक्षण गर्दा पोजेटिभ देखिएपछि राति ८ बजेतिर उनलाई गण्डक अस्पतालमा लगिएको थियो ।
पहिलेदेखि नै मुटु र मधुमेहका रोगी रहेका उनलाई स्वास्प्रस्वासमा समस्या देखिएपछि शनिबार नारायणी अस्पतालमा उपचाका लागि लगिएको थियो । नारायणी अस्पतालमा स्वाब दिएका उनलाई साँझ हेल्थकेयर हस्पिटल पुर्याइएको थियो ।
नारायणी अस्पतालको प्रयोगशालामा गरिएको परीक्षणमा ति वृद्धको रिपोर्ट पोजेटिभ आएको अस्पतालका मेेडिकल सुपरिटेन्डेन्ट डा. मदन उपाध्यायले बताए ।
गण्डक अस्पतालमा उपचारको क्रममा राखिएका ती वृद्धको स्वास्थ्य अवस्था राति ११ बजेतिरबाट गम्भीर बन्दैगएपछि भेन्टिलेटरमा राखेर उपचार गरिएको थियो । तर, आइतबार बिहान मृत्यु भयो ।
मृतक वृद्ध वीरगन्ज आदर्शनगरका व्यापारी हुन् । यसअघि वीरगन्जमै दुई दिनमा तीन जनाको कोराना संक्रमणकै कारण मृत्यु भैसकेको छ ।
यससँगै देशभर कोरोना संक्रमणबाट मृत्यु हुनेको संख्या ४६ पुगेको छ ।
निरन्तर कोरोना संक्रमण बढ्न थालेपछि शनिबार बिहानदेखि वीरगन्ज महानगरपालिका क्षेत्रमा निषेधाज्ञा लागु गरिएको छ ।
प्रतिक्रिया