काठमाडौं । पृथ्वी राजमार्गअन्तर्गत धादिङको बेनीघाट रोराङ गाउँपालिका–१० स्थित जवाङखोलानजिक सुक्खा पहिरो खसेपछि राजमार्ग पूर्ण रूपमा अवरुद्ध भएको छ।
जिल्ला प्रहरी कार्यालय धादिङका अनुसार बिहीबार साँझ तिग्राङखानी क्षेत्रबाट ठूलो परिमाणमा सुक्खा पहिरो खसेर सडक ढाकिएको हो। पहिरो निरन्तर खसिरहेकाले काठमाडौं–मुग्लिन सडकखण्ड भएर दुवैतर्फ सञ्चालन हुने सबै प्रकारका सवारीसाधन रोकिएका छन्।
पहिरोका कारण काठमाडौं आउने र बाहिरिने सयौं सवारीसाधन बीच बाटोमै रोकिएका छन्। सडक सञ्चालन हुन नसक्दा यात्रुहरू समस्यामा परेका छन्।
जिल्ला प्रशासन कार्यालय धादिङले पहिरो खस्ने क्रम नरोकिएको भन्दै अर्को सूचना प्रकाशित नभएसम्म पृथ्वी राजमार्ग भएर सञ्चालन हुने सबै प्रकारका सवारीसाधनको आवागमन पूर्ण रूपमा रोक लगाइएको जनाएको छ।
उता, जिल्ला प्रशासन कार्यालय चितवनले पनि सूचना जारी गर्दै नागढुङ्गा–मुग्लिन सडकखण्डअन्तर्गत धादिङको जवाङखोलामा पहिरोका कारण पृथ्वी राजमार्ग पूर्ण रूपमा अवरुद्ध भएकाले यात्रा नगर्न तथा वैकल्पिक व्यवस्था अपनाउन आग्रह गरेको छ।
प्रशासनका अनुसार पहिरो हटाउने कार्य सुरक्षा अवस्थाको मूल्यांकनपछि मात्र सुरु गरिनेछ। सडक अवरोध हटेपछि अर्को सूचना जारी गरिने जनाइएको छ।
प्रतिक्रिया