तम्घास । आम नागरिकलाई नियमन गर्ने गुल्मीका निजामति सेवामा कर्मचारी आफै नियमनमा नबस्ने गरेको पाईएको छ । जिल्ला प्रशासन कार्यालय गुल्मीद्वारा सरकारी कार्यालयहरुको अनुगमन गर्ने क्रममा अधिकांस सरकारी कार्यालयका कर्मचारीहरु न्युनतम निजामती कर्मचारीले पालना गर्नुपर्ने नियम पालना नगरेको पाईएको जिल्ला प्रशासन कार्यालय गुल्मीले जनाएको छ ।
जिल्ला प्रशासन कार्यालय गुल्मीले दुई दिन सम्म गरेको छड्के निरीक्षणका क्रममा जिल्ला सदरमुकाम तम्घासका सरकारी कार्यालयका ३४ जना कर्मचारीहरुले कार्यालयको पोशाक नलगाएको, २ वटा कार्यालयमा उजुरी पेटिका नभएको, २ जना कर्मचारी बिदा स्वीकृत नगराई बिदामा बसेको, २ जना कर्मचारी समयमा कार्यालयमा उपस्थित नभएको, २२ जना कर्मचारीले कार्यालयमा आई हाजिर नगरेको पाईएको जिल्ला प्रशासन कार्यालयले जानकारी दिएको छ ।
जिल्ला प्रशासन कार्यालयका अनुसार सदरमुकाम तम्घास स्थित ३ वटा कार्यालयको बेरुजु फर्छौट नभएको समेत अनुगमनमा पाईएको थियो । त्यस्तै कार्यालयमा अधिकांश कर्मचारीहरुले परिचय पत्र नलगाएको देखिएको जिल्ला प्रशासन कार्यालयले जनाएको छ । जिल्ला प्रशासन कार्यालयबार्ट छड्के सुरु गरेको टोलिले जिल्ला प्रशासनकै कर्मचारीहरु हाजिरी नगरि काम गरेको फेला पारेको थियो ।
पोशाक र परिचय पत्र नलगाएका कर्मचारीहरुको लागि पहिलो पटक कार्यालय प्रमुख र कर्मचारीलाई नै सचेत बनाईएको छ । दोस्रो चरणको अनुगमनमा पनि त्यस्ता कर्मचारी फेला परेमा कारबाही गरिने गुल्मीका प्रमुख जिल्ला अधिकारी भरतकुमार शर्माले बताए । नागरिकले सुशासनको अनुभुति गरे नगरेको, सेवा प्रवाह सरल र सहज भए नभएको र कर्मचारी आफैमा अनुशासनमा रहे नरहेको बिषयमा जानकारी लिन छड्के अनुगमन गरिएको प्रजिअ शर्माले बताए ।
जिल्ला प्रशासन कार्यालयका प्रशासकीय अधिकृत उद्धव पन्थीको नेतृत्वमा खटिएको टोलीले सदरमुकाम तम्घासमा रहेका विभिन्न २१ वटा सरकारी कार्यालयहरुको अनुगमन गरेको थियो ।
प्रतिक्रिया