आजको मौसम : देशभरको मौसममा बदली, हल्कादेखि मध्यम वर्षाको सम्भावना

काठमाडौं । देशभर मनसुनी वायुको प्रभाव कायमै रहेको छ ।

देशभरको मौसममा सामान्य बदली रही बागमती प्रदेश, गण्डकी प्रदेश, प्रदेश ५ र सुदुरपश्चिम प्रदेशका केही स्थानहरुमा बर्षा भइरहेको जल तथा मौसम विज्ञान विभागले जनाएको छ ।

आज दिउँसो देशभर आंशिकदेखि सामान्य बदली रही केहि स्थानहरुमा हल्कादेखि मध्यम वर्षाको सम्भावना रहेको छ । यसकासाथै प्रदेश १, बागमती प्रदेश, गण्डकी प्रदेश र सुदुर पश्चिम प्रदेशका एक, दुई स्थानमा भारी वर्षाको सम्भावना रहेको छ ।

ती स्थानका नदी तथा खोलाहरुमा आकस्मिक बाढी आउने सम्भावना रहेकाले तटीय क्षेत्र तथा भिरालो र कच्ची जमिन भएका स्थानमा सतर्कता अपनाउन विभागले जनाएको छ ।

त्यसैगरी आज राती देशभर सामान्य बदली रही केही स्थानहरुमा हल्कादेखि मध्यम वर्षाको सम्भावना रहेको छ । यसकासाथै प्रदेश १ र गण्डकी प्रदेशका एक, दुई स्थानमा भारी वर्षाको सम्भावना रहेको छ ।

यसले आकस्मिक बाढी पहिरोको प्रकोप पनि निम्त्याउन सक्ने सम्भावना रहेकाले सतर्कता अपनाउन जल तथा मौसम विज्ञान विभागले आग्रह गरेको छ ।