नेपालगन्ज । बाँकेमा आज फेरी ९ जना नयाँ कोरोना संक्रमित थपिएका छन् । भेरी अस्पताल नेपालगन्जमा गरिएको पीसिआर परीक्षणमा थप ११ जनामा कोरोना संक्रमण पुष्टि भएकोमा ९ जना बाँकेका हुन् भने २ जना सल्यानका हुन् । आज संक्रमण पुष्टि भएकाहरुमा ९ जना नेपालगन्जका स्थानीय बासिन्दा भएका स्वास्थ्य कार्यालय बाँकेले जनाएको छ ।
पछिल्लो पटक संक्रमण पुष्टि भएकाहरुमा नेपालगन्ज उपमहानगरपालिका वडा नम्बर –१ का २ जना, वडा नम्बर–४ का २ जना, वडा नम्बर २० का २, वडा नम्बर १० का १, वडा नम्बर १४ का १, वडा नम्बर १७ का १ जना रहेका छन् । वडा नम्बर १० मा ३० वर्षीया महिलामा पनि संक्रमण पुष्टि भएको छ ।
स्वास्थ्य कार्यालय बाँकेका अनुसार पछिल्लो ११ जना कोरोना संक्रमितमा अधिकांश स्थानीय तहका कर्मचारी रहेको पाइएको छ ।
आज पुष्टि भएका वडा नं. १४ र १८ नम्बरका दुई जना वडा सचिव, नेपालगञ्ज उपमहानगरपालिकाका अधिकृत, सरसफाई शाखा प्रमुख, आइटी अधिकृत, वडा कार्यालयका कम्प्यूटर अपरेटर रहेको जिल्ला स्वास्थ्य कार्यालय बाँकेका अधिकृत एवं कोरोनाका फोकल पर्सन नरेश श्रेष्ठले बताए । उनले १ जना जग्गा व्यवसायी र १ जना मार्बल टायल पसलेमा पनि संक्रमण पुष्टि भएको जानकारी दिए ।
आज पुष्टि भएका संक्रमितको स्वाव केही नेपालगञ्ज उपमहानगरपालिका कार्यालय र केहीको नगर भवनमा संकलन गरिएको थियो ।
भेरी अस्पताल नेपालगन्जले पछिल्लो पटक सय जनाको पीसिआर परीक्षण गर्दा ११ जनामा संक्रमण पुष्टि भएको जनाएको छ ।
प्रतिक्रिया