भारत प्रशासित जम्मु–काश्मिरको श्रीनगरमा दुई दिने कर्फ्यु लागेको छ ।
भारतले जम्मू–काश्मिरको विशेष दर्जा समाप्त पारेको पहिलो वर्ष पुगेको समयमा ठूलो विरोध प्रदर्शन हुने आशंकामा श्रीनगरमा कर्फ्यु लागेको हो । ४ र ५ अगष्टका लागि कर्फ्यु लगाइएको भारतीय अधिकारीहरुले बताएका छन् ।
अगलाववादी समुहबाट ५ अगष्टलाई कालो दिवस मनाउने तयारी भएका कारण कर्फ्यु लगाउनुपरेको श्रीनगरका जिल्लाधिकारीबाट जारी गरिएको आदेशमा उल्लेख गरिएको छ ।
गत वर्ष ५ अगष्टमा भारतीय जनता पार्टीको नरेन्द्र मोदी सरकारले जम्मु-काश्मिरलाई विशेष दर्जा दिने संविधानको अनुच्छेद ३७० लाई खारेज गरेको थियो ।
यसका साथै जम्मु-काश्मीरलाई दुई केन्द्रशासित प्रदेशमा विभाजित गरिएको थियो । मोदी सरकारको सो फैसला निकै विवादित बनेको थियो । काश्मीरका मूलधारका राजनीतिक पार्टीहरुसहित देशभरका सबै विपक्षी दलहरुले सो फैसलाको निकै विरोध गरेका थिए ।
भारतको संसदमा विपक्षी राजनीतिक दल र सत्तारुढ वीजेपीका सांसद र मन्त्रीहरुबीच हंगमा भएको थियो ।
जम्मु-काश्मिरको विशेषाधिकार हनन गरेलगत्तै भारत सरकारले त्यहाँको पार्टीका सबै मुख्य नेताहरुलाई नजरबन्दमा राखेको थियो भने लामो समयसम्म कास्मिर क्षेत्रको संचार सेवालाई नियन्त्रण गरिएको थियो ।
भारतीय कदमको विभिन्न अन्तराष्ट्रिय मञ्चबाट समेत आलोचना भएको थियो । संयुक्त राष्ट्र संघको मानवअधिकार उच्चायोगले जम्मु कास्मिरका जनताको आधारभूत मानवअधिकार हनन भएको भन्दै चिन्ता व्यक्त गरेको थियो ।
पाकिस्तानका प्रधानमन्त्रीले संयुक्त राष्ट्र संघको महासभामै पुगेर जम्मु कास्मिरमा भारतले अपराध गरेको बताएका थिए ।
एमेनेष्टी इन्टरनेशनल, ह्युमन राइट्स वाच लगायतका अन्तराष्ट्रिय मानवअधिकारवादी संघसंस्थाहरुले पनि जम्मु कास्मिरका जनताको सबैखाले अधिकार हनन गरिएको भन्दै आलोचना गरेका थिए ।
तर, भारत सरकारले भने जम्मु-काश्मिर भारतको आन्तरिक मामिला भएको भन्दै सबै आलोचनालाई अस्वीकार गर्दै आएको छ ।
प्रतिक्रिया