काठमाडौं । प्रदेश २ का आन्तरिक मामिला तथा कानुन मन्त्री ज्ञानेन्द्र कुमार यादवलाई कोरोना संक्रमण पुष्टि भएको छ ।
यादवलाई कोरोना पुष्टि भएसँगै प्रधानमन्त्री केपी शर्मा ओली लगायत संघीय सरकारका गृहमन्त्री लगायत उच्चपदस्थ सरकारी अधिकारीहरु समेत शंकाको घेरामा पुगेका छन् ।
केही दिन अघि यादव गृहमन्त्रालयले आयोजना गरेको प्रहरी समायोजन समन्वय समितिको बैठकमा भाग लिन काठमाडौं आएका थिए ।
त्यस कार्यक्रममा प्रधानमन्त्री ओली, गृहमन्त्री रामबहादुर थापा, गृहसचिव, प्रहरी महानिरीक्षक लगायत अन्य उच्चपदस्त सरकारी अधिकारीहरु सहभागी रहेका थिए । यसैले यादवको कन्ट्याक्ट ट्रेसिङको सुई उनीहरुसँग पनि पुग्ने देखिएको छ ।
काठमाडौंबाट प्रदेश फर्किएर पीसीआर परीक्षण गर्दा मन्त्री यादवमा कोरोना पुष्टि भएको हो ।
यादवको अवस्था सामान्य छ । यादवसँगै उनका पीएसओ, अंगरक्षक र सशस्त्र प्रहरीका एक जवानमा पनि कोरोना संक्रमण पुष्टि भएको छ ।
यसैगरी, जनता समाजवादी पार्टी जसपाका प्रदेश सभाकी एक सदस्यलाई पनि कोरोना पुष्टि भएको छ ।
प्रदेश २ मा अहिलेसम्म ५ हजार २ सय ७२ जनामा कोरोना संक्रमण पुष्टि भएको छ । संक्रमणकै कारण कारण प्रदेशमा मात्रै २१ जनाको ज्यान गइसकेको छ ।
प्रतिक्रिया