प्रसुति कक्षमा भर्ना भएकी गर्भवतीलाई कोरोना पुष्टि, भेरी अस्पतालको प्रसुति कक्ष सिल

नेपालगञ्ज । भेरी अस्पताल नेपालगञ्जमा शल्यक्रियाको तयारी गरिएकी गर्भवती महिलामा कोरोना पुष्टि भएपछि अस्पतालको प्रसुति कक्ष सिल गरिएको छ । महिना पुगेर डेलिभरीको लागि अस्पतालको प्रसुति कक्षमा भर्ना भएकी गर्भवति महिलामा कोरोना संक्रमण पुष्टि भए पछि प्रसुति वार्ड सिल गरिएको हो ।

रुकुम चौरझारीकी ती महिला बुधवार भर्ना भएकी थिईन् । उनको महिना पुगिसकेकाले विहीवार शल्यक्रिया गर्ने तयारी गरिएको थियो ।तर, शल्यक्रियाको तयारी भइरहेका बेला उनलाई एक्कासी ज्वरो आएपछि कोरोना परीक्षणका लागि स्वाव लिईएको थियो । शनिवार उनको रिपोर्ट पोजेटिभ आएको हो ।

संक्रमितलाई नेपालगञ्ज शिक्षण अस्पताल कोहलपुर लैजाने तयारी भइरहेको भेरी अस्पतालले जनाएको छ । शिक्षण अस्पताल कोहलपुरलाई सरकारले कोभिड ३ लेभलको अस्पतालको मान्यता दिएकाले उनलाई त्यस तर्फ लैजान थालिएको बताईएको छ ।

जटिल खालका कोरोना संक्रमित विरामीहरुको शिक्षण अस्पताल कोहलपुरमा उपचार हुने गरेको छ । यसअघि नै अस्पतालले कोरोना संक्रमित तीन जनाको सफल शल्यक्रिया गरिसकेको छ ।

भेरी अस्पतालले सिल गरिएको प्रसुति वार्डलाई सेनेटाईज गरेपछि मात्र सञ्चालनमा ल्याउने जनाएको छ ।