पोखरा स्वास्थ्य विज्ञान प्रतिष्ठानमा उपचाररत एक जना कोरोना संक्रमितको मृत्यु

पोखरा । लामो समयदेखि कोरोना भाइरसको संक्रमणबाट हुने मृत्यु नदेखिएको गण्डकी प्रदेशमा पुनः एक जनाको मृत्यु भएको छ ।

पोखरा स्वास्थ्य विज्ञान प्रतिष्ठानमा उपचाररत एक जना कोरोना संक्रमितको गए राति मृत्यु भएको हो ।

प्रतिष्ठानको कोभिड–१९ उपचार केन्द्रमा उपचार गराइरहका पोखरा महानगरपालिका–१९ निवासी ६२ वर्षीय पुरुषको मृत्यु भएको प्रतिष्ठानले जनाएको छ ।

ती पुरुषलाई गत साउन १७ गते अस्पताल भर्ना गरी उपचार सुरु गरिएको थियो । तर, स्वास्थ्य अवस्था कमजोर बन्दै गएपछि आईसीयूमा राखेर उपचार हुँदै आएको थियो । उनी मधुमेहका बिरामी रहेका थिए ।

यसअघि, पोखरा स्वास्थ्य विज्ञान प्रतिष्ठानमै दुई जना कोरोना संक्रमितको मृत्यु भएको थियो । यससँगै, नेपालमा कोरोना संक्रमणबाट मृत्यु हुनेहरुको संख्या ७४ पुगेको छ ।