हङकङका मिडिया टाइकुन जिमी लाइ पक्राउ परेका छन् ।
बेइजिङको कुट आलोचक रहेका जिमी लाइलाई हङकङ प्रहरीले सोमबार बिहानै उनकै निवासबाट पक्राउ गरेको छ ।
ट्याब्लोइड पत्रिका एप्पल डेल्लीका प्रमुख रहेका जिमीसँगै उनका दुई छोरा र पत्रिकाका दुई वरिष्ठ अधिकारीसमेत गिरफ्तारीमा परेको साउथ चाइना मर्निङ पोष्टले जनाएको छ ।
जिमीका एक छोराले राष्ट्रिय सुरक्षामाथि खतरा निम्त्याउन विदेशी एवं बाहिरी शक्तिसँग षड्यन्त्र गरेको अभियोगमा लगाइएको छ र अर्का छोरालाई ठगी गरेको अभियोग लगाइएको स्रोतलाई उदृध गर्दै साउथ चाइना मर्निङ पोष्टले लेखेको छ ।
नयाँ राष्ट्रिय सुरक्षा कानुन अन्तर्गत जिमीलाई पक्राउ गरेसँगै हङकङ प्रहरीले एप्पल डेल्लीको कार्यालयमा समेत छापा मारेको छ ।
मिडिया टाइकुन जिमीले गतवर्ष भएको सरकार विरोधी हिंसात्मक प्रदर्शनमा मुख्य भूमिका खेलका थिए । यसँगै उनले हङकङमाथि हस्तक्षेप गर्न अमेरिकालाई समेत आग्रह गरेको हङकङका अधिकारीहरुले आरोप लगाएका छन् ।
जिमीमाथि विदेशीसँग मिलेर मुलुकलाई धोखा दिएको, देशद्रोहको षड्यन्त्र गरेको आरोप लगारेको गरेको आरोप लागेको अर्को सूत्रलाई उदृध पोष्टले उल्लेख गरेको छ ।
एप्पल डेल्लीको कार्यालयमा छापा मार्न करिब २०० प्रहरी परिचालन गरिएको थियो । तर, सम्पादकीय विभाग र डेल्लीका कुनै पनि सम्वाददाताहरुमाथि भने हस्तक्षेप गरिएको छैन ।
गिरफ्तार भएका अन्य व्यक्तिहरुमा डेल्लीका सीईओ चेउङ किमहङ, वित्तीय अधिकारी चाउ टाटशुएन रहेका छन् । चाउलाई पनि देशविरुद्ध विदेशीसँग मिलेमतो गरेको अभियोग लगाइएको छ ।
हङकङमा गतवर्ष चीनमा सुपर्दगी कानुनको विरोधमा हिंसात्मक प्रदर्शन भएको थियो । सो प्रदर्शनलाई अमेरिका लगायतका पश्चिमा देशहरुले प्रत्यक्ष सहयोग गरेका थिए ।
अमेरिकाले प्रदर्शनकारीलाई सबैप्रकारको सहयोग गरेको भन्दै चीनले आफ्नो देशको आन्तरिक मामिलामा हस्तक्षेप नगर्न चेतावनी दिएको थियो ।
गत मेमा बसेको चिनिया पिपुल्स जनकंग्रेसले हङकङमा नयाँ राष्ट्रिय सुरक्षा कानुन लागु गर्ने निर्णय गरेको थयो । सो कानुन जुलाई १ देखि लागु भैसकेको छ । त्यसँगै मुख्यभूमि चीन विरुद्धका भैरहेका गतिविधिमाथि कडाई हुँदै आएको छ ।
राष्ट्रिय सुरक्षा कानुन लगाएसँगै अमेरिकाले हङकङलाई दिँदै आएको विशेष सुविधा खारेज गरेको छ भने हङकङका कैयौं अधिकारीहरुमाथि अमेरिकामा प्रतिबन्ध लगाएको छ । हङकङकै विषयलाई लिएर चीन र अमेरिकाबीच तनाबपूर्ण अवस्था निम्तिएको छ ।
चीनले आफ्नो मुलुकमाथि हुने कुनै पनि विदेशी हस्तक्षेपलाई अस्वीकार गर्दै त्यसलाई रोक्न जस्तोसुकै उपाय अपनाईने प्रष्ट पार्दै आएको छ ।
प्रतिक्रिया