काठमाडौं । सत्तारूढ नेपाल कम्युनिष्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल प्रचण्डबीच आज भेट भएको छ ।
पार्टीभित्रको अन्तरविरोध गत असार १६ गतेपछि चरमोत्कर्षमा रहेको बेलामा दुई अध्यक्षबीच भेट भएको हो ।
दुईजनाबीच लामो समयदेखि औपचारिक सम्वाद भएको थिएन । यद्यपी, टेलिफोनमा भने कुराकानी भैरहेको स्रोतले बताएको छ ।
अध्यक्ष ओलीलाई भेट्न प्रचण्ड प्रधानमन्त्री निवास बालुवाटार पुगेका छन् ।
आजको भेटमा पार्टीभित्र रहेको सम्वादहिनताको अवस्थालाई अन्त्य गर्दै बैठक सुचारू गर्नेबारेमा छलफल भएको बताइएको छ ।
गत असार १० गतेबाट सुरू भएको पार्टीको स्थायी कमिटी बैठकमा १६ गतेबाट चरम विवाद सुरू भएको थियो ।
अध्यक्ष प्रचण्डसहित प्रचण्ड-नेपाल पक्षका नेताहरूले प्रधानमन्त्री र अध्यक्षपदबाट ओलीको राजिनामा मागेपछि बैठक भाँडिएको थियो । त्यसपछि बारम्बार बैठक बस्ने मिति तय भएपनि अवरूद्ध हुँदै आएको छ ।
गत साउन १३ गते बोलाइएको बैठक ओलीले एकपक्षीय रूपमा स्थगित गरेपछि त पार्टीभित्रको भाँडभैलो झन
झाङ्गिएको थियो ।
यसबीचमा पार्टी बैठक बस्न नसकेपनि दुई समुहका बैठकहरू भने निरन्तर बसिरहेका छन् ।
ओली समुहले मदन भण्डारी फाउन्डेशनका नाममा तल्लो तहका कार्यकर्तासम्म भेला गरिरहेको छ । यस्तै, प्रचण्ड-नेपाल समुहले पनि प्रदेशस्तरका केन्द्रीय नेताहरूसम्म छलफललाई अघि बढाएका छन् ।
यतिबेला नेकपाका शिर्ष नेताहरू न त फुट्न सक्ने, न त मिल्नसक्ने अवस्थामा रहेका छन् ।
पार्टीमा फुट र विभाजनकारी सोचविरूद्ध एकता पक्षधर नेता, कार्यकर्ता र सांसदहरूको दबाब बढ्दै गएपछि दुबै पक्षका नेताहरू अलमलमा परेका छन् ।
प्रतिक्रिया