काठमाडौं । सत्तारुढ नेपाल कम्युनिष्ट पार्टी नेकपाको सचिवालय बैठक सुरु भएको छ ।
झण्डै डेढ महिनाको आन्तरिक किचलो र झण्डै एक महिनाको पानी बाराबार पछि शिर्ष नेताहरु सम्मिलित सचिवालय बैठक प्रधानमन्त्री निवास बालुवाटारमा सुरु भएको हो । गत साउन ४ गते पछि नेकपा सचिवालय बैठक बस्नै सकेको थिएन ।
बिहान ९ः३० बजे सुरु हुने भनिएको बैठक आधा घण्टा ढिलो १० बजेबाट सुरु भएको अध्यक्ष एवं प्रधानमन्त्री केपी शर्मा ओलीका प्रेस सल्लाहकार सूर्य थापाले जनाए । बैठकमा सचिवालयका ९ सदस्य उपस्थित रहेका छन् ।
शिर्ष नेताहरुबीच चलेको सत्ता संघर्षका कारण पार्टीको भविष्य नै संकटमा परेपछि नेताहरुले युद्धबिराम गर्दै कार्यदल गठन गरेपछि बैठक बस्न सम्भव भएको हो ।
कार्यदलले पार्टीभित्र देखापरेको समस्या र समाधानका उपायबारे नेतृत्वलाई प्रतिवेदन बुझाउने छ ।
आजको सचिवालय बैठकले कार्यदललाई औपचारिक रुपमा अनुमोदन गर्दै म्यान्डेड प्रदान गर्ने बुझिएको छ ।
महासचिव विष्णु पौडेलको संयोजकत्वमा गठन भएको ६ सदस्यीय कार्यदलमा तीन शिर्ष नेताका तीन निकट सहयोगी रहेका छन् ।
गत असार १० गतेबाट सुरु भएको नेकपाको स्थायी कमिटी बैठकमा १६ गतेपुगेपछि अध्यक्ष एवं प्रधानमन्त्री ओलीको राजीनामा माग्न थालिएपछि बैठक भाँडिन सुरु भएको थियो ।
त्यसपछि लगातार स्थायी कमिटी बैठक बस्ने प्रयत्न भएपनि सम्भव हुन सकेको थिएन । स्थायी कमिटी बैठककै बीचमा साउन ४ गते सचिवालय बैठक बोलाइए पनि त्यसले पनि निकास दिन सकेको थिएन ।
तर, यसबीचमा आफेनो समुहलाई बलियो बनाउन भने निकै मेहनत गरिएको छ । प्रधानमन्त्री ओलीले मदन भण्डारी फाउन्डेशनका नाममा पार्टीको तल्लो तहसम्म समानान्तर पार्टी संरचना तयार परेका छन् ।
प्रचण्ड–नेपाल समुहले पनि प्रदेशस्तरीय केन्द्रीय नेताहरुको भेला गर्दै पार्टी कमिटीमा मजबुत बनाउने प्रयत्न गरेको छ ।
दुवै समुह पार्टी फुटको अवस्थासम्मका लागि तम्तयार भएर बसेको अवस्थामा भएको युद्धबिराम स्थायी सम्झौतामा टुंगिन्छ कि टुंगिदैन त्यो भने हेर्न अझै केही समय कुर्नुपर्ने देखिएको छ ।
प्रतिक्रिया