एजेन्सी । इटालियन क्लब इन्टर मिलान युरोपा लिग फुटबलको फाइनलमा प्रवेश गरेको छ ।
सोमबार राति भएको सेमिफाइनलमा शाख्तर डोनेस्कमाथि ५–० को जित निकाल्दै इन्टर मिलानले फाइनलयात्रा तय गरेको हो ।
पहिलो हाफमा एक गोल गरेको इन्टर मिलानले दोस्रो हाफमा थप चार गोल गरेको हो । इन्टरका लागि रामेलु लुकाकु र लौतारो मार्तिनेजले दुई–दुई गोल गरे । यस्तै डानिलो डी’एमब्रोसिओले एक गोल गरेका हुन् ।
१९ औँ मिनेटमा मार्तिनेजले गोल गरेर इन्टर मिलानलाई सुरुवाति अग्रता दिलाए । ६४ औँ मिनेटमा डानिलोले गोल गरी अग्रता दोब्बर पारे । मार्तिनेजले ७४ औँ मिनेटमा व्यक्तिगत दोस्रो गोल गरे ।
त्यसपछि लुकाकुले लगातार दुई गोल गरेका हुन् । उनले ७८ र ८३ औँ मिनेटमा गोल गरेपछि इन्टर मिलान ५–० ले विजयी भयो ।
इन्टर मिलानले आउँदो शुक्रबार उपाधिका लागि स्पेनिस क्लब सेभिल्लासँग प्रतिस्पर्धा गर्ने छ ।
प्रतिक्रिया