बुटवल । कोरोना संक्रमितहरु स्थानीय तहले बनाएको आइसोलेसनमा नगएर घरमै सेल्फ आइसोलेसनमा बसेपछि बुटवल उपमहानगरका नगर प्रमुख संक्रमितहरुको घरघर पुगेर स्वास्थ्य लाभको कामनासहित औषधी दिएर फर्केका छन् ।
बुटवलमा ५० बढी संक्रमितहरु स्थानीय तहको आइसोलसनमा नगएर सेल्फ आइसोलेसनमा बस्ने निर्णय गरेपछि नगर प्रमुख शिवराज सुवेदी भिटामिन औषधीको मात्रा, जडिबुटी, आयुर्वेदीक औषधी सहितको टुल्स बनाएर संक्रमितको घरघर पुगेका छन् ।
घरको आइसोलेसनमा बस्दा अपनाउनु पर्ने स्वनियमन र दिनचर्याको रुटिन बनाएर संक्रमितको स्वास्थ्य लाभको कामना सहितको पत्र समेत सुवेदीले संक्रमितलाई दिएका छन् ।
बुधबार बुटवल उपमहानगरका विभिन्न वार्डमा होम आइसोलेसनमा बसेका २७ संक्रमितलाई औषधी सहितको स्वास्थ्य लाभको शुभकामना पत्र बुझाईएको बुटवल उपमहानगरपालिकाका प्रमुख प्रशासकीय अधिकृत चक्रपाणी शर्माले बताए ।
संक्रमितको हौसला बढाउन तथा आहार बिहारको जानकारी दिई कोरोनासँग लड्ने आत्मबल प्रदान गर्न संक्रमितको घरघर पुगेको उपमहानगर प्रमुख सुवेदीले बताए ।
नगरका प्रमुखकै नेतृत्वमा आयुर्वेद ओखतीसहित संक्रमितको घरदैलोमा पुगेर हौसला बढाउने र स्वास्थ्य लाभको कामना गर्ने यो नयाँ तरिका नेपालमै पहिलो पटक बुटवलमा सुरु भएको छ ।
बुटवल उपमहानगरमा २४ महिला र ३४ पुरुष घरमै आइसोलेट भएर बसिरहेकाछन् ।
सरकारले गठन गरेको केन्द्रीय कोभिड-१९ क्राइसिस म्यानेजमेन्ट सेन्टर (सीसीएमसी)ले संक्रमितहरु सरकारले ताकेको मापदण्ड पुरा गरेर घरमा आइसोलेसनमा बस्न पाउने ब्यवस्था गरेको छ ।
सीसीएमसीले ताकेको मापदण्डमा घरमा आइसोलेसनमा बस्ने संक्रमित हरेक दिन स्वास्थ्यकर्मीको निगरानीमा बस्नु पर्ने र स्वास्थ्य अवस्थाको बिवरण हरेक दिन स्वास्थ्यकर्मीलाई दिनु पर्ने ब्यवस्था गरिएको छ ।
प्रदेशको सामाजिक विकास मन्त्रालयले घरमा आइसोलेसनमा बसेका संक्रमितको स्वास्थ्य निगरानी गर्ने स्वास्थ्यकर्मीलाई बिषेश भत्ताको पनि व्यवस्था गरेको छ । लक्षण सहितको संक्रमितहरु भने सेल्फ आइसोलेसनमा बस्न नपाउने प्रावधान सीसीएमसीले बनाएको छ ।
प्रतिक्रिया