बर्दिया । बर्दियामा प्रहरीले करिब ४५ लाख बराबरको ओखर र छोहरा बरामद गरेको छ । प्रहरीले राजापुर नगरपालिका –७ बाट तीन सय ९६ बोरा ओखर र ५९ बोरा छोहरासहित दुई जनालाई पक्राउ गरहेको हो ।
पक्राउ पर्नेमा बर्दिया राजापुर नगरपालिका –४ राजापुर बजार बस्ने ३२ वर्षीय जाबेद मनिहार र सोही ठाउँमा व्यापार गर्ने कञ्चनपुर कृष्णपुर नगरपालिका –४ घर भएका रमेश ढुङ्गाना रहेका छन् ।
उनीहरु ओखर र छोहरा नेपालबाट भन्सार छली चोरीनिकासी गरी भारततर्फ लैजाने तयारी गर्दै गर्दा पक्राउ परेका हुन् ।
उनीहरुबाट करिब ४४ लाख ६९ हजार ९ सय ९० रुपैयाँ बराबरको सामान फेला परेको जिल्ला प्रहरी कार्यालय बर्दियाका सुचना अधिकारी प्रहरी नायव उपरीक्षक योगेन्द्रकुमार खड्काले बताए ।
पक्राउ परेको सामानसहित मनिहार र ढुङ्गानालाई आवश्यक कारवाहीका लागि राजापुर भन्सार कार्यालयमा पठाइएको सुचना अधिकारी खड्काले बताए ।
प्रतिक्रिया