कोरोना संक्रमणबाट पोखराका ५८ वर्षीय पुरुषको मृत्यु

पोखरा । पोखरामा शनिबार एक कोरोना संक्रमित पुरुषको मृत्यु भएको छ ।

पोखरा महानगरपालिका -१४ निवासी ५८ वर्षीय पुरुषको कोरोना संक्रमणका कारण मृत्यु भएको स्वास्थ्य निर्देशनालयले जनाएको छ ।

पोखरा स्वास्थ्य विज्ञान प्रतिष्ठानको अपरेशन विभागमा भाद्र ७ गते पेटको शल्यक्रिया गरेका ती पुरुषमा कोरोना संक्रमणको आशंका पछि भाद्र ८ गते स्वाब लिएर परीक्षणका लागि पठाइएकोमा भाद्र १० गते उनको रिपोर्ट पोजेटिभ आएको थियो ।

अस्पतालको आइसीयुमा उपचाररत ती पुरुषको भाद्र १३ गते शनिबार बिहान ११ बजे मृत्यु भएको अस्पतालका निर्देशक डा. अर्जुन आचार्यले पुष्टि गरे ।

शनिबार मात्रै गोरखा जिल्ला गोरखा, नगरपालिका -१३ मजुवा घर भइ भरतपुर अस्पतालमा उपचारत ३८ वर्षीय पुरुषको मृत्यु भएको थियो ।

कोरोना संक्रमणबाट प्रतिष्ठानको कोभिड-१९ उपचार केन्द्रमा मृत्यु हुनेको संख्या ७ पुगेको छ । पछिल्लो तीनदिन यता लगातार गण्डकीका ४ जनाले कोरोना संक्रमणकै कारण ज्यान गुमाएका छन् भने, हालसम्म प्रदेशमा कोरोना संक्रमणबाट ज्यान गुमाउनेको संख्या १२ पुगेको छ ।