विराटनगर । विराटनगरको न्यूरो अस्पतालमा मृत्यु भएका एकजना बिरामीको शव आफन्तले दाह संस्कार गर्न लैजाँदै गरेको अवस्थामा नेपाली सेनाको टोलीले बरामद गरेर दासंस्कार गरेको छ ।
अस्पतालबाट सामान्य मृत्यु भन्दै आफन्तले शव बुझेर दाहसंस्कारका लागि लैजाँदै गर्दा पीसीआर रिपोर्टमा पोजिटिभ पुष्टि भएपछि बीच बाटोबाटै सेनाको शव ब्यवस्थापन टोलीले शवको जिम्मा लिएर दासंस्कार गरिदिएको हो ।
मोरङको पथरी शनिश्चरे नगरपालिका-२ का ६१ वर्षीय पुरुषको शनिबार विराटनगरको न्यूरो अस्पतालमा उपचारका क्रममा मृत्यु भएको थियो ।
स्वास्थ्यमा समस्या देखिएपछि उनलाई भाद्र ३ गते न्यूरो अस्पताल भर्ना गरिएको थियो । मुटुसम्बन्धी रोगबाट पीडित उनको शनिबार मृत्यु भएको थियो ।
उनको बिहीबार स्वाब संकलन गरिएको भएपनि रिपोर्ट नआउंदै अस्पतालले आफन्तलाई शव बुझाए पछि आफन्तले दाहसंस्कारको तयारी गरेका थिए ।
दाहसंस्कारका लागि लैजाँदै गर्दा उनीमा कोरोना भाइरस रहेको रिपोर्ट आएको थियो ।
कोरोना नगेटिभ देखिएको भन्दै आफन्तले शव लगेको तर पोजेटिभ रिपोर्ट आएपछि स्थानीय प्रशासनलाई खबर गरिएको न्यूरो अस्पतालले जनाएको छ ।
अस्पतालले स्थानीय प्रशासनलाई खबर गरे लगत्तै सेनाको शव ब्यवस्थापन टोलीले शव बुझेर ब्यवस्थापन गरेको थियो ।
प्रतिक्रिया