चितवनमा फेरि अर्का कोरोना संक्रमितको मृत्यु

चितवन । चितवनमा कोरोना संक्रमणबाट मृत्यु हुने संख्या निरन्तर बढिरहेको छ । चितवन मेडिकल कलेजमा अर्का एक जना कोरोना संक्रमितको मृत्यु भएको छ ।

मृत्यु हुनेमा हेटौडौं उपमहानगरपालिका वडा नं. १५ निवासी ५८ वर्षीय पुरुष रहेको चितवन मेडिकल कलेजले जनाएका छ ।

कडा निमोनिया भई भदौ १४ गते भर्ना भएका ती पुरुषको १५ गते कोरोना परीक्षण गर्दा पोजेटिभ देखिएको अस्पतालका निर्देशक डा. दयाराम लम्सालले जनाएका छन् ।

श्वासप्रश्वासमा जटिलता उत्पन्न भएपछि भेन्टिलेटरमा राखेर उपचार गर्दागर्दा मंगलबार बिहान २ बजेर ५२ मिनेटमा उनको निधन भएको निर्देशक डा. लम्सालले उल्लेख गरेका छन् ।

यसअघि सोमबार मात्रै चितवनमा थप चार जनाको मृत्यु भएको थियो ।

चितवनमा संक्रमणबाट मृत्यु हुनेको संख्या १७ पुगेको छ । जसमध्ये चितवनका मात्रै ९ जना पुगेका छन् । मकवानपुरका ४ जना, गोरखा, पूर्वी नवलपरासी र बाराका १/१ जना रहेका छन् ।