काठमाडौं । हिमाल आरोहणका लागि नेपाल भ्रमणमा रहेका बहराइनका राजकुमारको टोलीले लोबुचे हिमालको सफल आरोहण गरेको छ ।
टोलीले शनिबार बिहान ८ बजेर ५० मिनेटमा ६ हजार १ सय १९ मिटर अग्लो लोबुचे हिमालको सफल आरोहण गरेको आरोहण व्यवस्थापक सेभेट समिट ट्रेकले ट्वीटमार्फत जनाएकोछ । आरोहणका लागि नेपाली शेर्पा गाइडले उनीहरुलाई सघाएका छन् ।
बहराइनका राजकुमारको टोली गत भदौ ३१ गते नेपाल आएको थियो । १५ जनाको सदस्य रहको टोली केही दिन गोकर्ण फरेस्ट रिसोर्टमा क्वारेन्टिनमा बसेर हिमाल आरोहणका लागि लुक्ला हुँदै लोबुचे पुगेको हो ।
यो टोलीले काठमाडौं फर्केर मनास्लु आधार शिबिरको समेत पदयात्रा गर्ने योजना रहेको छ ।
राजकुमारको टोली नेपालमा दुई महिना बिताउने छ । आगामी सिजनमा बहराइनका राजकुमारले सगरमाथा आरोहणको योजना बनाएका छन् । सगरमाथा आरोहणका लागि अहिले वार्मअफ आरोहण भैरहेको छ ।
प्रतिक्रिया