बागलुङ । नेपाली काँग्रेस बागलुङले ढोरपाटनका बाढी प्रभावित परिवारलाई नगदसहित राहत सामग्री प्रदान गरेको छ ।
आइतबार बाढीग्रस्त क्षेत्रमै पुगी ४० लाख बराबरको राहत हस्तान्तरण गरिएको काँग्रेस जिल्ला सभापति दीपेन्द्रबहादुर थापाले जानकारी दिए ।
बाढीमा ज्यान गुमाएका, बेपत्ता, घाइते र घरबासविहीन बनेका परिवारलाई राहत उपलब्ध गराइएको सभापति क्षेत्रीको भनाइ छ । काँग्रेस जिल्ला कार्यसमिति, क्षेत्रीय समिति, भातृ तथा शुभेच्छुक सङ्गठनलगायतको सक्रियतामा राहत जुटाइएको थियो ।
राहत अभियानमा काँग्रेसका नेता, कार्यकर्तालगायत देश–विदेशमा रहेका शुभेच्छुकहरुले आर्थिक सहयोग गरेका थिए । मृतक र बेपत्ता ३७ जनाका परिवारलाई रु सात हजारका दरले सहयोग उपलब्ध गराइएको बागलुङ–२ क्षेत्रीय समितिका सभापति द्रोर्ण कुँवरले बताए ।
घरबास गुमाएका ७९ परिवारलाई १८ वटाका दरले रङ्गीन जस्तापातासहित एक÷एक बोरा चामल, नून, तेललगायत खाद्यान्न सामग्री प्रदान गरिएको थियो । घरमा आंशिक क्षति पुगेका ४० र भाडामा बसेका तर सम्पत्ति गुमाएका १४ परिवारलाई पनि खाद्यान्न सामग्री वितरण गरिएको जनाइएको छ ।
यस्तै बाढीमा परी घाइते भएका तीन जनालाई रु पाँच हजारका दरले आर्थिक सहयोग गरिएको क्षेत्रीय सभापति कुँवरले बताउनुभयो । बाढीमा क्षतिग्रस्त जनचेतना आधारभूत विद्यालयका लागि १० बण्डल, तीन लघुजलविद्युत् आयोजना र सामुदायिक स्वास्थ्य एकाइलाई चार÷चार बण्डलका दरले जस्तापाता हस्तान्तरण गरिएको थियो ।
बाढी प्रभावित परिवारको तत्कालको खाँचो टार्न लत्ताकपडासमेत सहयोग गरिएको जनाएको छ । “अस्थायी बाससहित बाढी प्रभावितको दैनिक गुजारा चलोस् भनेर जस्तापाता, नगद र खाद्यान्न सहयोग गरेका हौँ”, क्षत्रीय सभापति कुँवरले भने ।
जिल्ला सभापति थापाले बाढी प्रभावित परिवारको दीर्घकालीन व्यवस्थापन र क्षतिग्रस्त भौतिक संरचनाको पुनःनिर्माण छिटो शुरु गर्न सरकारसँग माग गरे । जिल्ला सभापति थापासहित महाधिवेशन प्रतिनिधि जीतबहादुर शेरचन, नरबहादुर पुन, सिँहबहादुर राना, अर्जुन शेरचनलगायतको उपस्थितिमा राहत वितरण गरिएको थियो ।
गत भदौ १७ गते भूजीखोलामा आएको बाढीले ढोरपाटन नगरपालिकामा ठूलो जनधनको क्षति भएको छ । बाढीमा परी २२ जनाले ज्यान गुमाउनुप¥यो भने १५ जना अझै बेपत्ता छन् ।
बाढी प्रभावितका लागि राहत जुट्ने क्रम जारी छ । नगरपालिकाले खडा गरेको राहत कोषमा डेढ करोड बढी रकम जम्मा भइसकेको जनाइएको छ ।
प्रतिक्रिया