लण्डन । गैरआवासीय नेपाली संघ (एनआरएनए) का पूर्वअध्यक्ष शेष घलेले संघको नेतृत्व चयन अनलाइन मतदानबाट हुनु पर्ने विचार व्यक्त गरेका छन् ।
संघका प्रमुख संरक्षक समेत रहेका घलेले आइतवार संघद्धारा आयोजित ‘एनआरएन डे’ को विषेश कार्यक्रमलाई सम्वोधन गर्दै उक्त विचार व्यक्त गरेका हुन् ।
घलेले कोरोना महामारीकाबीच संघको नेतृत्व चयनको सम्भवना नभएको बताउदै अहिले अनलाइन भोटिङ्गको चर्चा चल्नु समय सान्दर्भिक र आवश्यक छलफलको विषय भएको बताए ।
राष्ट्रिय समिति (एनसीसीहरुमा)मा समेत निर्वाचन गर्नुपर्ने अवस्थामा कोरोना भाइरस बिरुद्धको भ्याक्सिन नआएसम्म संघमा फेस टु फेस निर्वाचन हुन नसक्ने भन्दै अनलाइन भोटिङ्गलाई विश्वसनिय बनाउन आग्रह गरे ।
पूर्वअध्यक्ष घलेले ‘भिजन २०२०’ मार्फत संघभित्र एमआईएस सिस्टमको शुरुआत गरेका थिए । संघको नेतृत्वले अहिले ‘भिजन २०२०’ को अवधारण अनुरुप अनलाइन मतदान सहितको प्रस्तावअघि सारेको छ ।
संघभित्र अनलाइन मतदानमार्फत संस्थालाई पुर्नसंरचना गर्ने प्रस्ताव अघि सारे पछि घलेले संघको निर्वाचन अनलाइन मार्फत हुनु पर्ने धारणा सार्वजनिक गरेका हुन् ।
घलेले अघि सारेको ‘भिजन २०२०’ अवधारणाले संघलाई अझ वैज्ञानिकरण र प्रविधीमैत्रीमा जोड दिएको छ ।
प्रतिक्रिया