वीपी कोइराला स्वास्थ्य विज्ञान प्रतिष्ठानमा थप एक कोरोना संक्रमितको मृत्यु

विराटनगर । धरानस्थित वीपी कोइराला स्वास्थ्य विज्ञान प्रतिष्ठानमा थप एक कोरोना संक्रमितको मृत्यु भएको छ ।

बुधबार बेलुका ७ बजे दांग्पा १ तेह्रथुमका ४९ वर्षीय पुरुषको आकश्मिक कक्षमा उपचारका क्रममा मृत्यु भएको हो ।

प्रतिष्ठानका सहप्रवक्ता डा.आशीष श्रेष्ठका अनुसार निमोनिया देखिएसँगै धनकुटा अस्पतालबाट अशोज २५ गते प्रतिष्ठानको आकश्मिक कक्षमा भर्ना गरिएको थियो । असोज २६ गते ती व्यक्तिमा कोरोना संक्रमण पुष्टि भएको थियो । बिरामीमा अरु कुनै दीर्घ रोग नरहेको सहप्रवक्ता डा.श्रेष्ठले बताए ।

योसँगै प्रतिष्ठानमा ५४ जना कोरोना संक्रमितको मृत्यु भएको छ । प्रदेश १ मा बुधबार कोरोना भाइरस कोभिड १९ का ४ सय ४५ जनामा संक्रमण पुष्टि भएको थियो ।

जसमा सुनसरीमा १ सय ९७, मोरंगमा १ सय ८५, झापामा ४६, उदयपुरमा ६, धनकुटा र इलामममा समान १ र प्रदेश १ बाहिरबाट ९ जनाको पीसीआर रिपोर्ट पोजिटिभ आएको थियो । धरान उपमहानगरपालिकामा बुधबार ४९ महिला र ६५ पुरुषसँगै १ सय १४ जनामा संक्रमण देखिएको थियो ।