काठमाडौं । प्रमुख प्रतिपक्षी दल नेपाली कांग्रेसले पर्सा जिल्लामा भएको नेकपाबीचको झडप र हत्या घटनाको छानवीन गर्न माग गरेको छ ।
गत असोज ६ गते भएको दुईपक्षीय गुट झडपमा नेकपा पर्साका सचिव मुकेश चौरसिया गम्भिर घाइते भएका थिए । उनको उपचारको क्रममा मृत्यु भएको थियो ।
काँग्रेस प्रवक्ता विश्वप्रकाश शर्माले शनिबार विज्ञप्ति जारी गर्दै घटनाको वास्तविकता तत्काल सार्वजनिक गर्न आग्रह गरेका छन् ।
‘पर्साका घटना विवरण अत्यन्तै दुःखद छ । अतः पर्साको घटनाको वास्तविकता तत्काल सार्वजनिक गर्न, विन्दावासनी गाउँपालिकाका नेकपा सचिव एवं नेकपा जिल्ला सदस्य मुकेश चौरसियाको हत्याको घटनाको गहिरो छानबिन गर्न र दोषीलाई तत्काल पक्राउ गरी कानुनी कारबाही गर्न नेपाली कांग्रेस सरकार समक्ष माग गर्दछ’, प्रवक्ता विश्वप्रकाश शर्माले जारी गरेको विज्ञप्तिमा उल्लेख छ ।
काँग्रेसले नेकपाकै कार्यकर्ताको हत्याको जाहेरी समेत नबुझ्ने सरकारबाट कानुनी राज्यको कस्तो अपेक्षा राख्ने भन्दै प्रश्न समेत गरेको छ ।
दोषीमाथि कारबाहीको जाहेरी बुझ्न प्रहरीले अस्वीकार गरेको भन्दै विज्ञप्तिमा भनिएको छ, ‘पर्साको घटनाले सत्ता उन्मादमा रहेको दलभित्रको द्वन्द्वले आफ्नै कार्यकर्ताको हत्या गरेर चरम असहिष्णु, उग्र र आपराधिक चरित्रको विकास हुँदै गरेको संकेत गरेको छ । घटनाका दोषीलाई कुनै गुटगत संरक्षण नदिइ कानुनी कारबाहीको कठघरामा उभ्याउनु राज्यको दायित्व हो ।’
‘तर ३ दिन पुग्दासम्म जाहेरी समेत नलिएर, नारायणी अस्पतालमा मृतकको शव रहिरहनु दुःखद र निन्दनीय छ’, काँग्रेसको विज्ञप्तिमा भनिएको छ ।
प्रतिक्रिया