काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले मुलुकमा देखिएको प्रतिगामी प्रवृत्तिलाई परास्त गर्न लोकतान्त्रिक र वामपन्थी शक्तिहरूबीच सहकार्य आवश्यक रहेको बताएका छन् ।
आइतबार राजधानीको राष्ट्रिय सभागृहमा जननेता मदन भण्डारीको ७५ औँ जन्मजयन्तीका अवसरमा आयोजित कार्यक्रममा सम्बोधन गर्दै ओलीले गत भदौ २३ र २४ गते भएका घटनालाई लोकतन्त्र र वामपन्थी आन्दोलनलाई कमजोर बनाउने षड्यन्त्रको संज्ञा दिए ।
उनले आफ्नो नेतृत्वको वैधानिक सरकारलाई झुटा आरोप, सामाजिक सञ्जाल र ‘मोबाइल फार्मिङ’मार्फत जनमत प्रभावित गरेर हटाइएको दाबी गर्दै सरकार गठन र परिवर्तन संसद्को अधिकार भए पनि बलपूर्वक संसद् विघटन गरी प्रतिगमनलाई संस्थागत गर्ने प्रयास भएको आरोप लगाए ।
अध्यक्ष ओलीले देशविरुद्ध दक्षिणपन्थी र प्रतिक्रियावादी शक्तिहरू सक्रिय रहेको उल्लेख गर्दै एमालेलाई कमजोर नठान्न चेतावनी दिए । “हामी मरेका छैनौँ, धुलो टक्टक्याउँदै फेरि उठ्छौँ,” भन्दै उनले प्रतिक्रियावादी शक्तिलाई परास्त गर्दै अग्रगामी परिवर्तनको यात्रालाई अघि बढाउने प्रतिबद्धता व्यक्त गरे ।
उनले एमालेको राजनीतिक, सामाजिक र आर्थिक नीति सही दिशामा रहेको दाबी गर्दै पार्टी एकताका नाममा नीतिगत सम्झौता नगर्ने स्पष्ट पारे । साथै, जनताको बहुदलीय जनवाद (जबज)लाई समयानुकूल परिमार्जन गर्दै ‘समृद्ध नेपाल, सुखी नेपाली’को लक्ष्य हासिल गर्ने एमालेको उद्देश्य रहेको बताए ।
ओलीले वर्तमान राजनीतिक चुनौतीको सामना गर्न लोकतान्त्रिक र वामपन्थी शक्तिहरूबीच सहकार्य अपरिहार्य भएकोमा जोड दिए ।
प्रतिक्रिया