काठमाडौं । पूर्वराष्ट्रपति विद्यादेवी भण्डारीले समयको आवश्यकता र संविधान कार्यान्वयनबाट प्राप्त अनुभवका आधारमा संविधान संशोधन गर्न सकिने बताएकी छन् ।
आइतबार जननेता मदन भण्डारीको ७५औँ जन्मजयन्तीका अवसरमा आयोजित कार्यक्रममा बोल्दै उनले संविधान संशोधन गर्दा मुलुकको विविध सामाजिक र राजनीतिक संरचनालाई विशेष ध्यान दिनुपर्ने धारणा राखिन् ।
भण्डारीले नेपालको जस्तो बहुजातीय, बहुभाषिक, बहुसांस्कृतिक तथा विविधतायुक्त मुलुकका लागि प्रत्यक्ष कार्यकारी शासन प्रणाली उपयुक्त नहुने बताइन् ।
“संविधान संशोधनको सन्दर्भमा बेला-बेलामा उठ्ने प्रत्यक्ष कार्यकारी शासन प्रणाली हाम्रो जस्तो बहुजातीय, बहुभाषिक, बहुसांस्कृतिक र विविधतायुक्त मुलुकका लागि उपयुक्त हुन सक्दैन भन्ने मेरो विचार छ,” उनले भनिन् ।
उनले आवधिक निर्वाचनमार्फत जनमत प्राप्त गर्ने लोकतान्त्रिक प्रणालीप्रति आफ्नो विश्वास रहेको उल्लेख गर्दै नेपालको कम्युनिस्ट आन्दोलनलाई अझ प्रभावकारी, जनमुखी र समयसापेक्ष बनाउँदै अघि बढाउनुपर्नेमा पनि जोड दिइन् ।
प्रतिक्रिया