काठमाडौं । नेपाल विद्युत प्राधिकरणको निमित्त कार्यकारी निर्देशकमा हितेन्द्रदेव शाक्य नियुक्त भएका छन् ।
ऊर्जा मन्त्रालयले अर्को व्यवस्था नहुन्जेलसम्मका लागि प्राधिकरणकै उपकार्यकारी निर्देशक रहेका शाक्यलाई निमित्त कार्यकारी निर्देशकमा नियुक्त गरेको हो । शाक्यले सोमबार नै पदबाहाली गरेका छन् ।
उर्जामन्त्री वर्षमान पुनले गत शुक्रबार प्राधिकरण संचालक समिति बैठकमा शाक्यको काज फिर्ता गर्न निर्देशन दिएसँगै उनले नै कार्यकारी प्रमुखको जिम्मेवारी सम्हाल्ने अड्कल गरिएको थियो । यसअघि उनी ‘एनईए इन्जिनियरिङ कम्पनी’मा कार्यरत थिए ।
एनईए इन्जिनियरिङ कम्पनी प्राधिकरणकै सहायक कम्पनी हो । २०७३ सालमा कुलमान घिसिङको पालामा स्थापना भएको कम्पनी परामर्श एवम् इन्जिनियरिङ सेवामा विदेशिने रकम जोगाउन भन्दै खोलिएको थियो ।
घिसिङको पदावधी सकिएपछि लेखनाथ कोइराला निमित्त कार्यकारी प्रमुख बनेका थिए । तर, आफुभन्दा जुनियरलाई निमित्त दिएको भन्दै शाक्य प्राधिकरणमा आएका थिएनन् । तर, अहिले भने तिनै कोइरालाले निर्णय गरी शाक्यलाई प्राधिकरणमा हाजिर गराएका छन् ।
प्रतिक्रिया