लक्ष्मीपूजाको दिन थपिए १९४६ नयाँ संक्रमित, २५०३ जनाले तिहार मनाउन पाउने

काठमाडौं । तिहारको विशषे दिन लक्ष्मी पूजा । तर, यो विशेष दिनमा पनि कोरोना भाइरसका सयौं संक्रमित थपिएका छन् ।

शनिबार १ हजार ९४६ जना नयाँ संक्रमित थपिएको स्वास्थ्य तथा जनसंख्या मन्त्रालयले जनाएको छ । शनिबार ३६ हजार ४५२ जना सक्रिय संक्रमित विभिन्न आइसोलेसनमा रहेका छन् । यी मध्ये अधिकांशको तिहार आइसोलेसनमै वित्ने भएको छ ।

मन्त्रालयले अपडेट गरेको पछिल्लो तथ्यांक अनुसार शनिबार थपिएका सहित हालसम्म नेपालमा २ लाख ८ हजार २९९ जनामा संक्रमण भएको छ ।

शनिबार २ हजार ५०३ जना संक्रमित संक्रमण मुक्त हुन सफल भएका छन् । यससँगै हालसम्म देशभर १ लाख ७० हजार ६३२ जना संक्रमित निको भैसकेका छन् ।

पछिल्लो २४ घण्टामा १३ जना कोरोना संक्रमितको मृत्यु भएको पनि मन्त्रालयले जनाएको छ । यससँगै हालसम्म १ हजार २१५ जनाको संक्रमणकै कारण मृत्यु भएको छ ।