तनहुँको मानहुँकोटमा हायस दुर्घटना : १ जनाको मृत्यु, ८ जना घाइते

तनहुँ । पोखराबाट तनहुँको मानहुँकोट घुम्न आएको हायस दुर्घटना हुदा एक जनाको मृत्यु भएको छ । तनहुँको व्यास नगरपालिका-५ मानहुँकोटमा दुर्घटना हुदा १ जनाको मृत्यु भएको हो ।

आज बिहान ग १ ख २९४२ नम्बरको हायस सडकबाट करिब ६ सय मिटर तल खस्दा पोखरा महानगरपालिका-३२ गगोनगौडा निवासी २८ वर्षीया सुनिता गुरुङको मृत्यु भएको हो ।

उनको उपचारको क्रममा दमौलीस्थित रत्नहरी अस्पतालमा मृत्यु भएको जिल्ला ट्राफिक प्रहरी कार्यालय तनहुँका प्रमुख रेशम रानाभाटले जानकारी दिए । दुर्घटनामा परि ८ जना घाइते भएका छन् ।

उनीहरुको अवस्था सामान्य रहेको रानाभाटले बताए । घाइतेहरुको रत्नहरी अस्पतालमा उपचार भइरहेको छ । घाइतेहरु सबै पोखरा-३२ का हुन् । पछिल्ला दिनमा पर्यटकको गतिविधि बढेको मानहुँकोटमा दृश्यावलोनका लागि गएको माइक्रो बिहान साढे ४ बजे दुर्घटना भएको हो ।