२४ घण्टामा २८ कोरोना संक्रमितको मृत्यु, १९४८ संक्रमित थपिए; ३१४० जना डिस्चार्ज

काठमाडौं । पछिल्लो २४ घण्टामा २८ जना कोरोना संक्रमितको मृत्यु भएको छ । एकैदिनमा यति धेरै मृत्यु भएको यो नै पहिलो पटक हो ।

स्वास्थ्य तथा जनसंख्या मन्त्रालयले बुधबार अपरान्ह अपडेट गरेको पछिल्लो तथ्यांक अनुसार १ हजार ९४८ जना संक्रमित थपिँदा मृत्यु हुनेको संख्या २८ मा पुगेको हो ।

देशभरका विभिन्न प्रयोगशालामा पीसीआर परीक्षण गर्ने क्रम निरन्तर घट्दै जाँदा संक्रमितको संख्या घटेपछि मृत्युदर बढ्दै जाँदा चिन्ता थपिएको छ ।

हालसम्म कुल संक्रमितको संख्या २ लाख २६ हजार २६ पुगेको छ । सक्रिय संक्रमितको संख्या १६ हजार ६३९ रहेको छ ।

देशभर हालसम्म मृत्यु हुनेको संख्या १ हजार ३८९ पुगेको मन्त्रालयले जनाएको छ ।

बुधबार ३ हजार १४० जना संक्रमित निको भएका छन् । यससँगै हालसम्म संक्रमण मुक्त हुनेको संख्या २ लाख ७ हजार ९९८ पुगेको छ ।