कपिलबस्तु । कपिलवस्तुका ‘फुच्चे गाइड’ राहुल साहनी २३ दिनपछि फेला परेका छन् । उनी फेलापरेसँगै ‘यति धेरै दिनसम्म कहाँ थिए त ?’ भन्ने जिज्ञासा धेरैलाई लागेको छ । कपिलवस्तु नगरपालिका–३ घर भएका साहनी गत कात्तिक १७ गते बिहानदेखि सम्पर्कविहीन भएका थिए । उनी गत कात्तिक १७ गते विद्यालय जान्छु भनेर साइकलसहित निस्केका उनी मंसिर १० बुधबार फेला परेका छन् ।
विद्यालय हिँडेका साहनी खुनुवा हुँदै राति ११ बजे भारतको बढनी पुगे । बढनीबाट गोरखपुर जाने बसको छतमा साइकल राखेर १८ गते बिहान ११ बजे गोरखपुर ओर्ले । गोरखपुरबाट बरालगञ्ज जाने बस चढेर अपराह्न साढे ३ बजे उनी बेलिपार्कमा आमाको काकाकी छोरी मीरा साहनीका घरमा पगे । दिदीका घरमा झण्डै २० दिन बसेपछि आमाबुबाको मायाले सताएकाले आफू फर्किएको साहनीले बताए ।
जम्मा तीन सय भारतीय रुपियाँ आफूसँग रहेकाले कतिपय ठाउँमा यात्रु भाडा दिएको र कतिपय ठाउँमा कार्ड देखाएर भाडा नदिने गरेको साहनीले बताए । बन्दाबन्दीपछि विद्यालय हप्तामा दुई दिन मात्र सञ्चालन हुने गरेको तर घरबाट सधैँ पढ्न जान दबाब दिने गरिएकाले आफू भागेको प्रहरीसमक्ष उनले बताए । रासस
प्रतिक्रिया