काठमाडौं । सत्तारुढ दल नेपाल कम्युनिस्ट पार्टीको सचिवालय बैठक सुरु भएको छ । तर बैठकमा अध्यक्ष एवं प्रधानमन्त्री केपी शर्मा अनुपस्थित भएका छन् ।
आफु निकट नेताहरुसँगको छलफलपछि यसअघि बैठकमा उपस्थित हुने भएको भनिएका ओलीले आजको बैठकलाई हिजोको पूर्वघोषणा अनुसार बहिस्कार गरेका छन् ।
प्रधानमन्त्री ओलीका प्रेस सल्लाहकार सूर्य थापाले बैठकमा प्रधानमन्त्री अनुपस्थित भएको जनाएका छन् ।
बैठक दिउँसो १ बजेका लागि बोलाइएको थियो । तर कार्यव्यस्तता भन्दै १ घण्टा पछि सारिएको थियो । प्रधानमन्त्री ओलीलाई कुर्दा उनी उपस्थित नभएपछि बैठक दिउँसो साढे २ बजेबाट सुरु भएको छ ।
बालुवाटारमै सुरु भएको बैठकमा अन्य सचिवालय सदस्यहरु भने उपस्थित छन् । बैठकमा अध्यक्षद्वय ओली र प्रचण्डका प्रस्तावमाथि छलफल गरी स्थायी कमिटीमा छलफलका लागि पठाइने बुझिएको छ ।
ओलीले भने प्रचण्डले माफी माग्दै आफ्नो प्रस्ताव फिर्ता नगरेसम्म बैठक बस्नुको औचित्य नहुने बताइसकेका छन् । उनले आफुलाई पार्टी अध्यक्ष र प्रधानमन्त्रीबाट हटाउन प्रचण्ड लगायतका नेताहरुले कु गर्न लागेको आरोप पनि लगाएका छन् ।
प्रतिक्रिया