काठमाडौं । नेकपा महासचिव विष्णु पौडेलले स्थायी समितिको बैठकमा प्रधानमन्त्री एवं अध्यक्ष केपी शर्मा ओली सहभागी हुने जनाउ दिएसँगै नेकपा स्थायी कमिटीको बैठकस्थल परिवर्तन भएको छ ।
कार्यकारी अध्यक्ष प्रचण्डले नियमित कार्यसूचि अन्तर्गत पार्टी केन्द्रीय कार्यालय धुम्बाराहीमा बैठक बोलाएपनि महासचिवको आग्रहमा बैठक प्रधानमन्त्री निवास बालुवाटारमै सारिएको हो ।
आजको बैठकमा यस अघि दुई अध्यक्षले प्रस्तुत गरेका १९ र ३८ पाने प्रस्ताव एवं विभिन्न पत्राचारका विषयमा स्थायी समितिका सदस्यहरुले बोल्ने कार्यसूचि छ । तर, पार्टीका केन्द्रीय सदस्य एवं पूर्वराजदूत कमानसिंह लामाको निधनप्रति शोक प्रस्ताव पास गर्दै अबैठक स्थगित गर्ने सम्भावना रहेको नेकपाका एक नेताले बताएका छन् ।
ती नेताका अनुसार, शोक प्रस्ताव पारित भएपछि कुनै पनि बैठक नियमित कार्यसूचीमा अघि नबढ्ने प्रचलन छ । नेता लामाको गत मंसिर २४ गते राति कोरोना संक्रमणबाट मृत्यु भएको थियो ।
बैठकको मिति लगातार सार्न चाहेका प्रधानमन्त्री ओलीलाई यो पनि एक अवसर हुने नाम नबताउने सर्तमा अर्का एक नेताले बताए । सम्भवत १–२ दिनका लागि बैठक पछि सर्नेछ । स्थायी समितिको बैठक सरेसँगै आसन्न केन्द्रीय कमिटीको बैठक पनि सार्न ओली पक्षको प्रस्ताव रहने अनुमान गरिएको छ ।
दुई अध्यक्षसहित नेकपामा विवाद चुलिंदै गएपछि आजको बैठकमा विवादको निकास निस्कने गरी छलफल हुने नेकपाका एकता चाहने कार्यकर्ताहरुले अपेक्षा गरेका थिए ।
प्रतिक्रिया