सिन्धुलीका ३५ वर्षीय पुरुषको कोरोना संक्रमणबाट मृत्यु

काठमाडौं । सिन्धुलीका एक ३५ वर्षीय पुरुषको कोरोना संक्रमणबाट काठमाडौं मृत्यु भएको छ ।

खोकी लागेर उपचारका लागि चार दिनअघि काठमाडौंस्थित केएमसी अस्पतालमा भर्ना गरिएको ती पुरुषको हिजो राति मृत्यु भएको हो ।

उनी रामेछाप, दोलखा, ओखलढुंगामा सामान ढुवानी गर्ने ट्रक चालक हुन् । कमलामाई नगरपालिका ५ रानीखोलाका पुरुषको निधनपछि दाहसंस्कारका लागि पहल गरिएको वडाध्यक्ष पूर्णबहादुर खड्काले जानकारी दिए ।

गाडी चलाउँदै गर्दा खोकी लागेको र चिसो लागेको ठानेर भाले काटेर झोल खाएका ती पुरुषलाई निमोनिया समेत देखिएको अस्पतालले जानकारी दिएको छ ।

हिजो बिहानसम्म खाना खाएका उनलाई हिजो दिउँसो कोरोना संक्रमण पुष्टि भएको जानकारी आएको थियो । उनको राति निधन भएको वडाध्यक्ष खड्काले बताए । कमलामाई नगरपालिका ५ मा एक महिनाको बीचमा कोरोना संक्रमणबाट दुईजनाको निधन भएको छ ।