काठमाडौं । नेपाल कम्युनिष्ट पार्टी नेकपा को प्रचण्ड-नेपाल पक्षका अध्यक्ष माधवकुमार नेपालसँग नेपालका लागि चिनियाँ राजदूत होउ यान्छीले भेटवार्ता गरेकी छिन् ।
सत्तारुढ नेकपामा विभाजन आएपछि यान्छीले अध्यक्ष नेपालसँग पहिलोपटक भेटवार्ता गरेकी हुन् ।
भेटका अवसरमा दुवै जनाबीच दुई मुलुकका आपसी हितका विषयमा छलफल भएको नेकपा विदेश विभागका उपप्रमुख विष्णु रिजाले जनाएका छन् ।
यसअघि राजदूत यान्छीले राष्ट्रपति विद्यादेवी भण्डारी र नेकपा अध्यक्ष पुष्पकमल दाहाल प्रचण्डलाई भेट गरिसकेकी छिन् । नेकपा विभाजनको अवस्थामा मौन जस्तै देखिएकी यान्छी विभाजन पछि भने भेटघाटमा व्यस्त देखिएकी छिन् ।
पछिल्लो राजनीतिक घटनाक्रमले नेकपामा विभाजन आएपछि छिमेकी चीन निराश बनेको छ । एकीकृत अवस्थाको नेपाल कम्युनिष्ट पार्टीसँग चिनियाँ कम्युनिष्ट पार्टीको उच्चस्तरको सम्बन्ध रहेको थियो ।
प्रतिक्रिया