काठमाडौं । जनता समाजवादी पार्टी (जसपा) संघीय परिषद अध्यक्ष डा. बाबुराम भट्टराईले ओली सरकारले चुनाव गर्नै नसक्ने दाबी गरेका छन् ।
प्रतिनिधिसभा विघटनको विरोधमा जसपाले गरेको विरोध प्रदर्शनपछि आयोजित सभालाई सम्बोधन गर्दै अध्यक्ष भट्टराईले ओलीद्वारा आफुनो निरंकुश शासन लाद्ने उद्देश्यले चुनावको कुरा गरेको बताए । भट्टराईले चुनाव हुन्छ भन्ने भ्रममा नपर्न नेपाली काँग्रेसलाई आग्रह पनि गरे ।
पूर्व प्रधानमन्त्री भट्टराईले भने, ‘चुनाव हुन्छ र चुनावमा गएपछि कांग्रेस ठूलो पार्टी हुन्छ र सरकार चलाउँछौं भन्ने भ्रममा नपर्नुस् ।’ आफ्नो प्रभुत्व कायम नभएसम्म ओलीबाट चुनावको आश गर्नु बेकार भएको भन्दै उनले काँग्रेसलाई नअल्मलिकन आन्दोलनमा सहभागी हुन आग्रह गरे ।
अध्यक्ष भट्टराईले प्रतिनिधिसभा पुनस्र्थापना हुन्छ भन्ने कुरामा पनि विश्वास नलागेको बताए । उनले भने ‘अदालतबाट आशा त गरौं तर भरै पर्ने ठाउँ छैन ।’
‘ओलीले चुनाव गराउने भए मन्त्रिपरिषद विस्तार गर्ने थिएनन’, उनले भने, ‘सरकार प्रतिनिधिसभा विघटन भएपछि काम चलाउ भैसकेको छ । कामचलाउ सरकारले मन्त्री थप्दैन ।’ आफुले १२ वटा मन्त्रालय खाली हुँदा पनि मन्त्री नथपेको स्मरण गर्दै भट्टराईले चुनाव घोषणा गरेपछि प्रधानमन्त्रीले मन्त्री नियुक्त गर्न नपाइने जिकिर गरे ।
भट्टराईले ओली निरंकुश शासक बनेको दाबी गर्दै उनको शासन फाल्न संयुक्त जनआन्दोलन गर्नुपर्ने बताए । उनले सहकार्यका लागि सबै दलहरुलाई आग्रह पन गरे । उनले प्रधानमन्त्री केपी शर्मा ओलीले विघटन गरेर प्रतिगमन गर्न खोजेको बताए।
प्रतिक्रिया