काठमाडौं । नेपाल कम्युनिष्ट पार्टी नेकपाको प्रचण्ड-नेपाल पक्षले प्रदेश २ को संसदीय दलको नेता परिवर्तन गरेको छ ।
प्रचण्ड-नेपाल पक्षले संसदीय दलका नेताबाट सत्यनारायण मण्डललाई हटाएर सो ठाउँमा शत्रुधन महतोलाई चयन गरेको छ । मण्डल ओली पक्षीय सांसद हुन् । मण्डल ओली पक्षको प्रदेश २ का इन्चार्ज समेत हुन्।
यसअघि प्रचण्ड-नेपाल पक्षले मण्डल विरुद्ध अविश्वासको प्रस्ताव दर्ता गरेको थियो ।
मंगलबार बसेको प्रदेश संसदीय दलको बैठकले अविश्वासको प्रस्ताव पारित गर्दै मण्डललाई संसदीय दलको नेताबाट हटाएको हो ।
नयाँ नेता चयनका लागि निर्वाचन कार्यक्रम सार्वजनिक गरिएकोमा सांसद महतोको एकल उम्मेदवारी परेपछि उनी निर्विरोध चयन भएका थिए ।
प्रदेश २ मा नेकपाका ३२ जना सांसद रहेका थिए । जसमध्ये १८ जना सांसदले हस्ताक्षर गरी मण्डलविरुद्ध अविश्वासको प्रस्ताव दर्ता गराएका थिए । महतोलाई दल नेता चयन गर्न भने १९ जना सांसदको हस्ताक्षर संकलन भएको थियो ।
प्रतिक्रिया