सुर्खेत । कर्णाली प्रदेशका उद्योग पर्यटन वन तथा वातावरण मन्त्री नन्दसिंह बुढाले पंदेशमा राजनीतिक स्थिरताका लागि प्रचण्ड-नेपाल पक्षलाई समर्थन गरेको बताएका छन् ।
ओली पक्ष छाडेर गत आइतबार देखि प्रचण्ड नेपाल पक्षमा लागेका मन्त्री बुढाले आज एक विज्ञप्ति जारी गर्दै राजनीतिक स्थिरताका निम्ती प्रचण्ड–नेपाल समूहमा लागेको जनाएका छन् । उनले पार्टी एकताको अन्तिम चरणमा दुर्भाग्यवश विभाजनको भयानक अवस्थामा पुगेको बताउंदै नेपाली कम्युनिस्ट आन्दोलनलाई सफल र एकीकृत बनाउन आफुले प्रचण्ड–नेपाल पक्ष रोजेको बताएका छन् ।
ओली पक्षमा रहेका सामाजिक विकासमन्त्री दल रावल र सांसद पदम रोकायाले आइतबार नै ओली पक्ष छाडेर प्रचण्ड–नेपाल समूह रोजेको घोषणा गरेको भएपनि बुढाले औपचारीक जानकारी गराएका थिएनन् ।
मन्त्री बुढा प्रचण्ड–नेपाल पक्षमा सामेल भएसँगै कर्णाली प्रदेश सरकारमा ओली पक्षको प्रतिनिधित्व शून्य भएको छ । पूर्वमाओवादी तर्फबाट मुख्यमन्त्री महेन्द्र बहादुर शाही, आन्तरिक मामिला तथा कानुनमन्त्री नरेश भण्डारी र भूमि व्यवस्था, कृषि तथा सहकारी मन्त्री विमला केसी छन् । त्यस्तै आर्थिक मामिला तथा योजना मन्त्री प्रकाश ज्वाला सुरुदेखि नै प्रचण्ड–नेपाल पक्षमा सक्रिय थिए ।
कर्णालीमा नेकपाका ३३ प्रदेशसभा सदस्यमध्ये प्रचण्ड–नेपाल पक्षमा २२ जना छन् भने सभामुख राजबहादुर शाहीसहित ११ प्रदेशसभा सदस्य ओली पक्षमा खुलेका छन् ।
प्रतिक्रिया