काठमाडौं । खुल्ला राजनीतिमा आउने संकेत गरेको नेत्रविक्रम चन्द नेतृत्वको नेकपालाई सो पार्टीका नेता धर्मेन्द्र वास्तोलाको पक्राउले पुनः भुमिगत हुनुपर्ने अवस्था सिर्जना गरिदिएको छ ।
मोहन वैद्य नेतृत्वको नेकपा ९क्रान्तिकारी माओवादी०, ऋषिराम कट्टेलको नेकपा, र विश्वभक्त दुलाल ‘आहुति’ को वैज्ञानिक समाजवादी कम्युनिस्ट पार्टीसँग मोर्चा बनाएर शान्तिपूर्ण आन्दोलनमा आउने संकेत गरेको विप्लप समूहलाई बास्तोलाको गिरफ्तारीले पछाडि धकेलिदिएको छ ।
केहिदिन पहिले मात्र उनीहरूले संयुक्त विज्ञप्ति जारी गदै संयुक्त मोर्चामार्फत आफ्ना कार्यक्रम सार्वजनिक गर्ने जानकारी दिएका थिए ।
बास्तोला पक्राउ परेसँगै ‘विप्लव’ को प्रतिवन्धित नेकपाले नेपाल बन्द लगायतका संघर्षको कार्यक्रम घोषणा गरेको छ।
पार्टीका केन्द्रीय समिति सचिवालय सदस्य बास्तोलाको गिरफ्तारीविरुद्ध विप्लव समूह आन्दोलनमा उत्रेको हो। प्रहरीले नेता बास्तोलासहित विवेक कुमाल र रोजन रखाललाई बुधबार ललितपुर र मकवानपुरको सीमा क्षेत्रबाट पक्राउ गरेको थियो ।
विप्लवले बिहीबार प्रेशित गरेको विज्ञप्तिमा सभा, जुलुश, मसाल जुलुशलगायत नेपाल बन्दका कार्यक्रमसमेत घोषणा गरिएको छ। विज्ञप्तिमा ३ गते देशब्यापी जुलुस प्रदर्शन गर्ने, ५ गते विरोधसभा, ७ गते विरोध प्रदर्शन, ९ गते मसाल जुलुस र १० गते नेपाल बन्दको घोषणा गरिएको छ ।
विज्ञप्तिमा भनिएको छ, ‘जनताको अधिकारको हनन, भ्रष्टाचार, दलाली, कमिसनखोरी, तस्करी, राष्ट्रघातका विरुद्ध सङ्घर्ष गरिरहेको पार्टीका नेता–कार्यकर्तालाई खोजी–खोजी गिरफ्तार गर्नु, हिरासतमा निर्मम यातना दिनु, जेल हाल्नु, लाखौँ धरौटी तोक्नु कुनै पनि राजनीतिक व्यवस्थाको सामान्य मान्यतालाई समेत धज्जी उडाउनु हो ।’
प्रतिक्रिया