ओलीलाई साधारण सदस्यबाट समेत निष्काशन गर्ने प्रचण्ड-नेपाल नेकपाको निर्णय

काठमाडौं । नेपाल कम्युनिष्ट पार्टी नेकपाको ‘प्रचण्ड–नेपाल’ पक्षले प्रधानमन्त्री केपी शर्मा ओलीलाई पार्टीका साधारणसदस्य समते नरहने गरी निष्काशन गर्ने निर्णय गरेको छ ।

प्रचण्ड-नेपाल पक्षको शुक्रबार बसेको स्थायी कमिटी बैठकले प्रधानमन्त्री एवं पार्टीका पूर्वअध्यक्ष ओलीलाई गम्भीर अनुशासन उल्लंघन गरेको आरोप लगराउँदै साधारणसदस्य समेत नरहने गरी कारवाही गर्ने निर्णय गरेको हो ।

पार्टीबाट निष्काशनका लागि ओलीलाई स्पष्टीकरण सोध्ने निर्णय गरेको स्थायी कमिटी सदस्य बेदुराम भुषालले जानकारी दिए । यसैगरी बैठकले पार्टीका महासचिव विष्णु पौडेललाई पनि कारवाही गर्न सिफारिस गरेको छ ।

प्रधानमन्त्री एवं नेकपाका अध्यक्ष ओलीले गत पुष ५ गते प्रतिनिधिसभा भंग गरेपछि सोही दिन प्रधानमन्त्री निवास बालुवाटारमा बसेको प्रचण्ड नेपाल पक्षीय स्थायी कमिटी सदस्यहरुको बैठकले अध्यक्षबाट हटाउने सिफारिस गरेको थियो । त्यसलगत्तै पुष ७ गते बसेको केन्द्रीय कमिटी बैठकले स्थायी कमिटी बैठकको सिफारिसलाई सदर गरेको थियो ।

नेकपा अहिले दुई फ्याकमा विभाजन भैसकेको छ । एक पक्षको नेतृत्व प्रचण्ड-नेपालले गरेका छन् भने अर्को पक्षको नेतृत्व ओलीले गरेका छन् । तर, कानूनी रुपमा निर्वाचन आयोगले भने नेकपाको विभाजनबारे अहिलेसम्म निर्णय लिन सकेको छैन ।