सुभाष नेम्वाङको यूटर्न देखेर राजनीतिशास्त्री लोकराज बराल भए अचम्मित

काठमाडौं । राजनीतिशास्त्रका प्राध्यापक लोकराज बरालले सुवास नेम्वाङको यूटर्न देखेर अचम्म लागेको जनाएका छन् ।

विगतमा नेम्वाङले प्रधानमन्त्रीले प्रतिनिधिसभा विघटन गर्न नपाउने बताउँदै आएका थिए । तर, प्रधानमन्त्री केपी शर्मा ओलीले प्रतिनिधिसभा विघटन गरेपछि लामो समयसम्म मौन बसेका थिए ।

नेम्वाङले शनिबार ओली पक्षीय नेकपाको १ नं. प्रदेशस्तरीय कार्यकर्ता भेलालाई काठमाडौंमा सम्बोधन गर्दै संसदीय शासन प्रणालीमा विशेष अधिकारको विषय उठाएर प्रधानमन्त्रीले विघटन गरेको भन्दै प्रधानमन्त्रीको कदमको बचाउ गरेका थिए ।

नेम्वाङको यही दुई थरी कुरा सुनेपछि अचम्मित भएका प्राध्यापक बरालले आइतबार ट्वीट गर्दै भनेका छन्,
‘सुभाष नेम्वाङले युटर्न गरेको देखेर राजनीति यस्तै हुँदो रहेछ भन्ने लाग्यो ।’

सुभाष नेम्वाङले युटर्न गरेको देखेर राजनीति यस्तै हुँदो रहेछ भन्ने लाग्यो ।

— Lok Raj Baral (@BaralLok) January 17, 2021

डेढ वर्षअगाडि मात्रै नेम्वाङले संसदीय पत्रकारहरुलाई गरेको सम्बोधनमा नेपालको संविधान, २०७२ मा प्रधानमन्त्रीलाई संसद् विघटन गर्ने अधिकार नभएको बताएका थिए । नेम्वाङको सो भिडियो यतिबेला भाइरल बनेको छ ।